محرر الأقباط متحدون
شن الكاتب والمفكر محمد أبوقمر، هجوم حاد علي صافيناز كاظم بعد هجومها علي الراحل الكاتب بهاء طاهر، مؤكدا أن "هناك ناس بتفضل عايشه حتي بعد موتها، وناس بتموت وهي لسه عايشه".
وقال محمد أبو قمر عبر حسابه علي موقع التواصل الاجتماعي فيس بوك: انتظرت صافيناز هانم لما بهاء طاهر يموت علشان تهاجمه وتسيء له، وأنا مش عارف ليه كانت مخبيه كرهها ده للراجل ولم تصرح به وهو عايش، بهاء طاهر مكنش يخوف، ولا كان شايل سيديهات لحد علشان يحمي نفسه بها من صافيناز أو غيرها إذا هاجموه أو انتقدوه .
وتابع: جايز جدا تكون صافيناز هانم متغاظه من عنوان رواية بهاء طاهر "خالتي صفية والدير وكان في نفسها يكتب العنوان "خالتي صافيناز والدير".
وجايز جدا تكون صافيناز هانم عايزه الناس تفتكرها بعد ما طواها النسيان بعد ما كان اسمها مجلجل لما اتجوزت أحمد فؤاد نجم .
وأختتم: عموما في ناس بتموت وهي لسه عايشه، وفي ناس بتفضل عايشه حتي بعد ما ماتت، بهاء طاهرعايش في أدبه وترجماته وسيرته الناصعة كواحد من فرسان الحياة الأدبية والثقافية، لكن إللي زي صافيناز هانم خلاص، خلاص من زمان، مفيش حاجه ممكن افتكرها بها غير إنها في يوم من الأيام اتجوزت أحمد فؤاد نجم وبعدين الراجل طلقها من غير ما يقول ليه، بعد كده حتي كلامها عن النبيل بهاء طاهر هايتنسي زي كل حاجه ليها منسية لفقدانها أي قيمة معرفية.
