رشا الشهيد
أولاد حدفوا طوب على قطار... اصيب السواق إصابة شديدة في عينه وجسمه ..
البهوات والهوانم الإعلاميين بيسألوا ليه ده يحصل ازاي وصلنا لكده..
أنا أقولهم ليه وصلنا لكده وياريت حد من اللي بيتابعوني وبيراقبوني يوصلولهم ليه وصلنا لكده ..

وصلنا لكده بسببكم..بسبب اعلام فاشل وفاسد وتافه... همكم الترند واستضافة التافهين وتنجيم الساقطين... وتطلعوا تلغوا وتاكلوا في البرامج زي المحاريم...
ماشفتش حلقة مع عالم أو طبيب أو معلم ..مافيش حلقات عن التربية وتعظيم قيم الاخلاق والإنسانية... مافيش حلقات عن تاريخ وثقافة وفن .. وإن حصل وعملتوا بتكون مجرد لقطة لتغطية حدث مقصور على فئة معينة مش لعامة الشعب ... علشان برده تدخلوا الترند ..

وصلنا لكده بسبب تعليم بايظ .. المدرس مش بيعرف يعطي معلومة في فصل فيه خمسين طالب... بس بيوصلها كويس اوي في مركز دروس فيه 500 طالب ..
وأهالي بتقف على اللجان تدرب المدرسين اللي مسهلوش الغش .

ووزراء بيعكوا ومنفصلين عن الواقع ..
وانتم كاعلاميين تطبلوا لسيادة الوزير.. أو تعملوا شو لمجرد تاخدوا الترند واللقطات برده .

وصلنا لكده لان قصور الثقافة اما مقفولة أو متحكم فيها إسلامجية متطرفين ووزراء ثقافة فوق نايمين على ودانهم أو خايفين على الكرسي أو بايعين ثقافة وتراث مصر للي يدفع اكتر من الدراهم أو الريالات .. ومافيش مثقف واحد عارف يقول كلمة ببساطة لاطفال القري والكفور ...بسبب محاربته لو كان مثقف شريف ..أو فذلكته ونرجسيته إذا كان مثقف مدعي

وصلنا لكده لان الحجر بقي أهم من البشر
كل المشروعات اللي بتتعمل دي معرضة للخطر
النهاردة القطار اتحدف بالطوب... و دي مقدمة لا تنذر بخير .
بكرة المشروعات اللي فرحانين بها هي اللي هتتحدف بالطوب..

أنا مش متشاءمة ولا كارهة..أنا واقعية وفاهمة يعني ايه برمجة سلبية للعقل ..
عقول الأطفال كل مدخلاتها عنف وتفاهة وتطرف.. مش منطقي انتظر مخرجات وسلوكيات سليمة
المدخلات من البيت والمدرسة والتلفزيون والشارع
وللاسف كلهم الزمن ده بيشاركوا في سلب الإنسان ادميته وانسانيته..إما بسبب تطرف ديني أو تفاهة سلوكيات وقيم أو سطحية تفكير أو إلهاء متعمد أو تعتيم عن حقائق وعدم استعمال العقل..
هذا ما كسبت ايديكم .
وبتحاولوا ترموا خطأكم على غيركم

كلكم مجتمعين السبب . قبل ماتحاسبوا اطفال .حاسبوا نفسكم
هم نبتة اتروت بماء ملوث ..بسببكم