كتب - محرر الاقباط متحدون
قال الاعلامي احمد سالم :" لو حد فاكر اني شايف مصر جنة وكل مشاكلها اتحلت يبقي غلطان ،مصر ماشية في طريق طويل جدا و حققت حاجات صعبة ولسة قدامها حاجات أصعب ،انا شخصيا مش متفائل بتطوير القطاع العام اللي فشل في العالم كله ،ولا راضي عن الانضباط في الشارع والمرور والنظافة،و مش عاجبني الضغط الشديد علي الطبقة المتوسطة، و حزين علي التراخي في التعامل مع الانفجار السكاني، و قلقان من المنافسة غير العادلة مع القطاع الخاص اللي بيمر بفترات صعبة جدا ، ولسة صحة وتعليم المصريين قدامهم كتير عشان يبقوا عند مستوي طموحاتنا.
وفيما يلي نص منشوره عبر حسابه الخاص بموقع فيسبوك :
لكن ده لا ينفي النجاح الساحق في ملفات تانية زي الإسكان ،الطرق ، العشوائيات ، الأوبئة ،الإصلاح المالي ،الشمول المالي ،التصدير، الإنتاج الغذائي ،المدن الجديدة ،السياسة الخارجية بس فيه مشكلة لازم تتحل قبل ما نتكلم في اي إصلاح و هي :
إن معظم المصريين بيشوفوا الفصل المدرسي المزدحم تقصير من الدولة مش انفجار سكاني مدمر .
قذارة الشوارع إهمال حكومي مش سلوكيات شخصية كريهة.
البطالة بسبب هستيريا التعليم الجامعي هي تراجع لدور الدولة في توفير وظائف إدارية ملهاش اي ٣٠ لازمة مش إصرار ساذج علي الوصول لحلم وهمي اسمه المؤهل العالي.
التحرش الجنسي نتاج للكبت و شوفوا لابسة ايه و ايه اللي وداها هناك مش سلوك شاذ ينم عن فكر شهواني رخيص .
الدفاع عن حقوق الحيوان ناس فاضية بتوع بابي و مامي مش رحمة أمرتنا بها كل الأديان .
الدفاع عن حقوق المرأة ده واد ممحون و حكاك و بيلم لايكات مش تحضر و دعم لأهم عنصر في المجتمع اللي بيربي الرجالة و مسؤولين عن كل الأجيال .
اللي راكب توكتوك في شارع رئيسي او فارش بضاعة في نص الشارع غلبان وعلي باب الله مش شخص ضد القانون و يستحق العقاب.
الضرايب جباية وسرقة مش المصدر الأساسي لأي موازنة في العالم .
رجال الأعمال كلهم حرامية و هليبة مش ناس فاتحين بيوت ٨٠% من المصريين .
الوزراء و المسؤولين كلهم فاسدين و مش حاسين بالناس مش ناس بتحاول تصلح منظومة متهالكة و سابوا الشغل في مؤسسات دولية بأضعاف مرتبهم.
العيال بتيجي برزقها و تحديد النسل حرام رغم ان عم عبده الغلبان عنده ٧ عيال كلهم عيانين ومش لاقيين ياكلوا .
الزيادة السكانية ثروة بشرية بس العيب في الإدارة رغم ان الصين لولا سياسة الطفل الواحد كان زمانها أفقر دولة في العالم .
السياحة حرام و الفن دياثة و البنوك ربا و الثقافة علمانية.
لكن التحرش كبت و البنت ما تورثش في الأرض و ضرب الزوجات تأديب و الرشوة تفتيح مخ و الحشيش والترامادول نباتات طبية وأدوية و كسر إشارة المرور فهلوة و التزويغ من الشغل شقاوة والغيبة والنميمة نقد و اصلاح للمجتمع.
