كتب - محرر الاقباط متحدون
اشاد عدد كبير من رواد التواصل الاجتماعي بمدرسة الشهيد مصطفي نصار الرسمية للغات، لجهودها في الانفتاح على الاخر ونشر التسامح، حيث نظمت رحلة للتلاميذ الى الكنيسة المعلقة، وقام المدرس بشرح تاريخها لهم.
وجاء بنص المنشور المتداول :
# شاهدت موقف في الكنيسة المعلقة
دخلت رحلة من مدرسة ابتدائية كل الطلبة مسلمين و معاهم طاقم تدريس معظمه محجبات و منقبات .. بدأ مدرس مسلم و حطوا تحتها 100 خط ، بدأ يشرح لهم و قال لهم اولا الكنيسه مكان عبادة و بيت لله زيها زي المسجد و زي المعبد اليهودي .. انت بتصلي لربنا في المسجد و اخواتنا المسيحيين بيصلوا هنا لربنا ..
و بدأ يشرح تفاصيل الكنيسه و قال شايفين ده اسمه الإنبل و ده احنا خدناه في المسجد و اسمه عندنا المنبر .. و شرح لهم الاتناعشر عمود بيرمزوا لإيه و قال لهم هتلاقوا هنا 3 عواميد زياده واحد بيرمز للسيد المسيح و اتنين لكتبة الانجيل اللي مش من التلاميذ : لوقا و مرقس .. و قال لهم المنجلية دي زي المقرأة عندنا ..
و الغريب انه حكى لهم قصة معجزة نقل جبل المقطم و قال لهم إن بصلاة الاقباط الله نقل جزء من الجبل و حكى لهم عن ظهور العدرا و شرح لهم رموز كنسية زي العنب و السمكة و لما ولد سأله عن رفات القديسين قال له ان دول قديسين المسيحيين بيفتخروا بيهم لانهم اباء رهبنة و شهداء زيهم زي الرموز عندنا كشيوخ كده و قال لهم ان اللي بنى المساجد في بداية دخول الإسلام مصر كانوا مهندسين مسيحيين و شرح لهم ليه بنولع شمع في الكنايس و في الاخر صورهم و هما بيولعوا شمع قدام صورة العدرا .
انا شخصيا اتبسطت جدا بالفكرة انك تروح تعرف معتقد غيرك بدون تجريح و إن احنا نزرع جوه اولادنا فكرة محبة الآخر و قبول الاختلاف.
لفت انتباهي إنه ماقالش هما بيقولوا او هما بيؤمنوا بكذا ، لأ ده شرح كإنه مسيحي بيشرح لحد مسيحي بدون اي تفريق ولا تمييز بين هما و هما ، مبسوط من فرحة الاولاد اللي كانت باينة في عينيهم عشان بيزوروا مكان جديد ، المجد لكل مدرس بيزرع حاجه هتكبر بكرة جوه جيل جديد لازم يتعايش بمحبة ، فيها حاجة حلوة
#الكنيسة_المعلقة
عن مدرسة الشهيد مصطفي نصار الرسمية للغات ادارة المستقبل التعليمية نتحدث.
