كتب - محرر الاقباط متحدون
وجه الاعلامي احمد سالم، رسالة عبر حسابه الخاص على فيسبوك، حملت عنوان "بعد حوار مع صديقي المكتئب في كندا" وجاء بنصها :
بعد حوار مع صديقي المكتئب في كندا، اكتشفت إن مصر فيها حاجة اسمها روح مش موجودة في أي بلد في العالم ومستحيل تلاقيها مهما دفعت لأنها مش للبيع.
مصر بلد لها طعم حرش والفرق بينها وبين أي بلد هو نفس الفرق بين الكشري بالشطة وبين البروكلي والخضار المسلوق.
مصر يعني العزوة واللمة وازاي ترمي نكتة مع واحد ماتعرفوش وتصاحب سواق التاكسي وتعرف قصة حياته في أقل من ربع ساعة .
مصر فعلا هي أمي اللي بحبها علي بعضها وشايفها أحلي مخلوق في الدنيا مهما عملت فيَّ ،ممكن نزعل ونتصالح في اليوم ١٠٠مرة لأني أول ما ابص في عينيها بانسي كنت زعلان من ايه.
مصر دي غريبة ،ممكن تزعل منها وتبقي عايز تسيبها وتهج، لكن بعد أول شهر بالكتير في الغربة بتوحشك وبتبقي عايز تسيب الدنيا وترجع تترمي في حضن أمك...حضن مصر.
مصر دي لو كانت جبل كان اتهد من اللي شافته لكن مين يقدر علي البلد الوحيد اللي اتذكر في التوراة والإنجيل والقرآن وكأنها تحت مظلة إلهية تحميها من الفتن.
مصر لو فيها حاجات غلط هنصلحها ولو مش النهاردة يبقي بكرة ،اليأس والإحباط مش هايوصلونا لحاجة،المهم إن كل واحد فينا يبدأ بنفسه وباللي حواليه لغاية ماتبقي مصر اللي نفسنا فيها.
#مصرجميلة#خليك_فاكر
#اللي_جاي_احلي
#فيهاحاجةحلوة
#حاجةحلوةجدا
