كتب - محرر الاقباط متحدون
اثار تصريح لدكتور شريف أبو النجا الرئيس التنفيذي لمستشفى 57357 ، بخصوص مراقبة ميزانية المستشفى، غضب عدد كبير من رواد التواصل، وادلى بالتصريح في اطار نقص التبرعات.
حيث رد د. شريف أبو النجا في تصريحات خاصة لبرنامج الحكاية، تقديم الاعلامي عمرو اديب على فضائية mbc مصر، على سؤال يقول : " هل هناك من يراقب ميزانية مستشفى 57357؟"
وقال أبو النجا :" الميزانية يراقبها الله سبحانه وتعالى ، مجلس الامناء محترم وفيه ناس بتتبرع بعشرات الملايين، مين هيراقبهم على فلوسهم .
وعلى اثر هذا التصريح، قال رواد تواصل ان هناك فساد، متذكرين كتابات السيناريست الكبير الراحل وحيد حامد، في اطار معركته الاخيرة بعنوان "فساد مستشفى الاطفال" حيث كان تحدث عن تلاعب في اموال التبرعات .
كما سلط الضوء على معركة حامد، الكاتب الصحفي احمد شوقي العطار ، وكتب عبر حسابه على فيسبوك :" الأستاذ الكبير وحيد حامد رحمة الله عليه فتح ملف مستشفى 57357 من 4 سنين تقريبًا.
وأما نتكلم عن قامة بحجم وحيد حامد قررت في نهاية عمرها شن حملة صحفية بالأرقام والمستندات والوقائع، فالبتأكيد مش هتكون مجرد كلام فاضي أو مصلحة أو ركوب لتريند.
إيه اللي حصل بعد مقالات وحيد حامد:
- حملات ضده من لجان إلكترونية على مواقع التواصل بتدافع باستماتة عن (ش) إللي كنا منسمعش عنه قبلها وبتشتم رمز من أهم وأعظم رموز الفن والثقافة في تاريخ مصر، وبتصفه بالخرف والخبل.
- حملات موجهة وصلت لحد السب العلني ضد وحيد حامد على مواقع وصحف إلكترونية ومواقع التواصل برضو، كان وراها كاتب وإعلامي جه اسمه في اتهامات وحيد بالفساد، وهو بسم الله ما شاء الله حاضر بقوة هو وشلته على مواقع التواصل، وجوه القنوات، وفي كل مكان هتلاقيه، وهو وشلته متابعينهم ملايين، ومنهم ناس بيكتبوا اليومين دول بكل حزن وأسى على اللي وصلتله المستشفى، ووقتها دافعوا باستماتة عن صاحبهم عشان يحموه من المساءلة على حساب الأطفال والمرضى، أو على جثثهم للدقة.
- مجموعة من النخب والأسماء المعروفة، سواء أصحاب (ش) أو الكاتب إياه، طلعوا بيان تضامن مع إدارة المستشفى ضد وحيد حامد.
- الدكتور سمير صبرى قدم بلاغ للنائب العام ضد وحيد حامد اتهمه بنشر أخبار كاذبة.
-اتصل به مسؤول سابق، محذرًا إياه: احترس فقد دخلت في عش الدبابير.. على حد تعبير وحيد حامد نفسه.
- الأستاذ مكرم محمد أحمد الله يرحمه قرر مع نفسه كده حظر النشر في الموضوع ووقتها النائب العام أمر بمثول مكرم محمد أحمد أمام «أمن الدولة العليا» للتحقيق معه لأنه لا يملك حظر النشر.
-وزارة الصحة والجهات المعنية لا حس ولا خبر.
ثم مات الموضوع، ومات وحيد حامد، وماتت 57357. البقاء لله..
كما تداول رواد التواصل منشور، جاء بنصه :
سنة 2018 وحيد حامد، تقدم ببلاغ إلى النائب العام ضد ، المدير العام لمستشفى 57357، تضمنت الشكوى انه ارتكب جريمة استغلال النفوذ بـ"المحسوبية الفجة بالمعينين في المستشفى، وإن الإدارة كلها بتهيمن عليها أسرته و قرايبه و اصحابة وبيديهم مرتبات خيالية
وإن إدارة #مستشفى57357 صرفت تبرعات دون الحصول على موافقة أصحاب الأموال والمخالفة للنظام الأساسي للمستشفى، إذ تبرعت المستشفى لهيئة الصرف الصحي بمبلغ 37.5 مليون جنيه بشكل غير قانوني.يعني مستشفى قايمة على التبرعات تتبرع لهيئة حكومية ليه أقرع ونزهي
وإنه تم إهدار #مستشفى57357 للمال العام، بأنه وجد في تقرير المراقب المالي عن عام 2017، التبرعات أكثر من مليار جنيه تلتهم
-الإعلانات منها 136 مليون جنيه
-الأجور عام 2016 281 مليون جنيه
-الميزانية التقديرية لعام 2018 وصلت لـ400 مليون جنيه، كان المخصص منها لعلاج الأطفال 164 مليون
وزارة التضامن كجهة مشرفة قامت بعمل لجنة للتحقيق في الموضوع وقالوا في نهاية التحقيق أن المستشفى زي الفل واللي بيقول غير كده يبقى بيحقد علينا، رحم الله وحيد حامد واسكنه فسيح جناته.
وكتب عمر علي :" طيب الشئ بالشئ يذكر ، وحيد حامد في يونيو 2018 كتب سلسلة مقالات نارية على صفحات المصري اليوم فضح كم الفساد اللي في إدارة مستشفى 57357 بداية من استخدام الأطفال المرضى في حملات إعلانية مكلفة جدا وان دا ضد حقوق المريض وضد الدين والشرع والانسانية بل زادت الإدارة انها كمان أصبحت تستعين بأهالي الأطفال في الإعلانات من أجل جمع الأموال .
( بالمناسبة مؤسسة مرسال - Mersal Foundation هي المؤسسة الوحيدة في مصر اللي دستورها وأهم مبدأ فيها رفص تام للتعرض لأي مريض أو التشهير به أو استغلاله والحفاظ على سريته وبياناته وبيانات أسرته مقدس عندهم ) .
* حامد فضح وكشف ان المستشفى تحكمها عائلة بمثابة العزبة.
* كمان أكد إن كلهم بيقبضوا أرقام خيالية وبيغرفوا من التبرعات اللي بتكون من الإعلانات اللي بيظهر فيها الأطفال المرضى وأهاليهم .
* غير ان فيه جمعية غامضة في أمريكا أسستها الاسرة الحاكمة في المستشفى مفيش عليها أي رقابة ولا معروف ايه هدفها ولا الدولارات بتيجي منها ولا بتسافر لها .
* كشف وحيد عن تبرع المستشفى بمبلغ 38 مليون جنيه لهيئة التأمين الصحي رغم ان قانون المستشفى بيمنع التبرع بأي جنيه لأي جهة غير غرضها وهو علاج الأطفال .
* كشف إن حجم التبرعات بيزيد عن المليار جنيه سنويا بيتصرف منها بالكتير 200 مليون جنيه وان من تقرير المراقب المالي في 2017 التبرعات تخطت المليار اتصرف منها 136 مليون اعلانات وعلاج أطفال 164 مليون .
وان مرتبات 2015 210 مليون جنيه و 2016 281 مليون جنيه ووقتها متمش الكشف عن مرتبات 2017
* غير ان فيه غش انهم بيعلنوا ان نسبة الشفاء 100% والحقيقة ان فيه نسبة وفيات 25%
*وحيد حامد كتب الكلام دا للناس اللي فاكره وكانت متابعة وقتها وانا استغربت ازاي المصري تنشر كلام زي دا وازاي هو اصلا ينشر الكلام دا ، الدنيا اتشقلبت عليه بلاغات من سمير صبري المحامي وهجوم جبار من الاعلام عليه زي أحمد موسى وغيره واتمنع نشر باقي حلقات المقالات دي.
وأعلنت وزارة التضامن انها حققت وان مفيش اي فساد ورد وحيد ان محدش سأله ولا حقق معاه جاب الكلام دا منين ولا حتى حد طالبه اظهار المستندات اللي معاه وان الوزارة حققت مع نفسها ودا اللي دفعه انه يقدم بلاغ في (ش) بدعوى استغلال النفوذ والمحسوبية الفجة في التعيين ووجود جمعية في امريكا واكاديمية طبية للعلوم دورهم مش معروف ومشبوه وطبعا الموضوع مات بعدها وأعتقد لولا تاريخه وقيمته الفنية كان اتعمل معاه الغلط أكتر من كدا بكتير.
ومات وحيد حامد بعدها في يناير 21 وميت انهارده بقاله سنتين ، فالراجل دا هو أول واحد فتح الملف دا واتكلم وكان لوحده بيصرخ وبيحارب والناس كانت مصدومة ومتفاجئة من الأرقام المذكورة وصلات القرابة ، انهارده حد من الادارة بيتكلم انه كان فيه تلات ودائع تم فك الوديعة الاخيرة منهم الفترة اللي فاتت غير طبعا اغلاق مستشفى طنطا ، وانهارده فيه صرخات استغاثة لنجدة المستشفى مش للبحث ليه هي وصلت كدا !!!!!
المقال في التعليقات
https://akhbarak.net/news/16337400/articles/31779573/%D8%A7%D9%84%D9%82%D8%B5%D8%A9-%D8%A7%D9%84%D9%83%D8%A7%D9%85%D9%84%D8%A9-%D9%84%D9%85%D8%B9%D8%B1%D9%83%D8%A9-57357-%D8%A8%D9%8A%D9%86-%D9%88%D8%AD%D9%8A%D8%AF-%D8%AD%D8%A7%D9%85%D8%AF-%D9%88%D8%B4%D8%B1%D9%8A%D9%81
