كتب - محرر الاقباط متحدون
وجه الشيخ نشأت زارع إمام وخطيب مسجد آل شعبان بقرية سنفا التابعة لمركز ميت غمر فى محافظة الدقهلية، رسالة عبر حسابه الرسمي على فيسبوك ، بعنوان "مصر زمان ومصر فى 2023" ، وجاء بنصها :
اول بوست لى فى 2023، مصر زمان ومصر فى 2023، زمان لما كان المسلم والمسيحى واليهودى بيعيشوا بجوار بعض ولا يعرف احدهم ديانة الاخر ده كان فى مصر زمان.
نجيب الريحانى كان مسيحى وبديع خيري مسلم ام بديع خيري ماتت ونجيب راح يدور فى الكنائس على العزاء علشان يحضر فلم يجد حتى سأل وعرف ولما قابل بديع خيري بيقوله بحثت فى الكنائس فلم أجد العزاء قاله وليه تروح الكنائس انا مسلم قاله صحيح انت مسلم قاله نعم قاله انت مقلتش لى قاله هو انت سألتنى وكان معاهم فى المجموعة استيفان روستى يهودى والشيخ محمد رفعت وكانوا بيتجولوا بالحنطور فى شوارع القاهرة.
ده كان زمان ايام التسامح الدينى بين الاديان لما كان بيعيش فى مصر حسن ومرقص وكوهين وتم طرد كوهين ٠ ايام ماطلع القمص سرجيوس على منبر الازهر وكان هو خطيب ثورة 19 من فوق منبر الازهر دون ان يجد احد اى غرابة ٠
الان فى 2023 هتشوفوا يوم 7 ينايرالقادم ترسانات عسكرية امام الكنائس ودبابات وعربات مصفحة برشاشات بتحمى الكنائس.
ليه ايه اللى حصل اللى حصل فى العقود الاربعة الماضية غزو وهابى تم الانفاق عليه مليارات الدولارات من اموال البترودولار وصّل مصر للحالة دى واصبح العلاج منه شبه مستحيل بعد ماتمكن من مصر من اركانها الاربعة وجاءنا بفيرس العداء للمسيحى وكراهيته وتكفيره وتحريم الترحم عليه وتحريم تهنئته ووووووو دى الحقيقة الذى لاينكرها اقل واحد باحث وعنده الف باء فكر.
الحالة الاولى دى موجودة الان فى كل دول العالم الذى تخلصت من امراضها الطائفية والمذهبية والعنصرية واصبحت دول مدنية ودول مؤسسات الولاء فيها للاوطان واما الدين علاقة بينك وبين الله ، فهل نأمل ان يكون عام 2023 هو عام الدولة المدنية فى مصر اتمنى ذلك ٠
