كلمات ✍️ عادل غبريال
كل شويه بيطلع قرار جديد من البيه
بيزيد الطينه بله والمواطن تطلع عنيه
وعلشان العيشة مره قرر يعوم الجنيه
والمواطن الغلبان يموت
طيب وفيها إيه؟!
والبلد تنضف من الغلابه
ويعيش بس البيه
مالك يابلد بقيت ظالمة
وقاسية كده ليه؟!
🏊♀️ 🏊♀️ 🏊♀️
الدولار زاد والدهب زاد حتى العيش زاد
واللى بياخد القرار . كل يوم بيزيد عناد
والناس الغلابه .عن فكر المسؤولين بعاد
والجنيه غلبان . مبيعرفش يعوم ياولاد
رموه ف البحر🏊♀️ ورموا معاه كل العباد
أرحموا الناس يرحمكم الله يوم الميعاد
🏊♀️ 🏊♀️ 🏊♀️
زمان قلتم أستحملوا😥وأربطوا الحزام
ولأجل خاطر البلد الناس صدقوا الكلام
ورغم ضيق المعيشة . كانت الأمور تمام
لكن الناس م الغلا تعبت مش عارفه تنام
ومقضياها عيش حاف . يا أكلى الحمام
🏊♀️ 🏊♀️ 🏊♀️
ولا عارفه تكفى إيه؟!
إيجار والا كهربا وميه
وتليفون وغاز وأدويه
ومدارس ودروس خصوصيه
وملابس العيد ومعاها العيديه
وعيش بس مع فول وطعميه
الغلبان يكفى إيه والا إيه ؟؟!!!
#مبيعرفش يعوم 🏊♀️ ياولاد
#بقلمي عادل غبريال
