د.محمد طه
بيخرج يصطاد بالنهار.. يوفر قوت يومه ليه ولعائلته.. يواجه ويصارع ويحارب المعتدين على مكانه أو قبيلته.. يزرع ويحصد لو كان موجود جنب نهر.. يدور ويحفر آبار لو كان عايش فى منطقة صحراوية..
وبعد ما الشمس تغيب.. ونور النهار يروح.. ويحل الظلام.. وتترصع السماء بالنجوم.. يلاقى جسمه بيتعب شوية.. وعضلاته بترتخى شويتين.. يفاجئ إن قواه بتخور تدريجياً.. أمام ظاهرة غريبة وعجيبة.. وان بأسه بينهار ببطئ بفعل قوى غير مفهومة ولا معلومة المصدر.. تتسرب إليه من داخله.. وتتخلل وجوده وعقله وجسده.. وتهزمه وتطرحه أرضاً.. هكذا بكل بساطة.. ودون أدنى مقاومة..
قوى ساحقة ماحقة.. اسمها (النوم)..
يغيب عن الوعى.. ينتقل لحالة أخرى من الوجود.. مش فاهم إيه اللى بيحصله ولا ليه ولا إزاى..
لغز بمعنى الكلمة..
مش كده بس..
فيه لغز أكبر وأعجب..
وهو اللى بيحصل للإنسان ده أثناء حالة النوم.. بيشوف حاجات وهو مغمض عينيه.. بشر وحيوانات وكائنات مختلفة.. بيسمع أًصوات مش موجودة حواليه.. صراخ وضحك وكلام وحديث.. بيطير.. بيعوم.. بينتقل أماكن تانية.. ممكن يحارب.. ممكن يمارس الجنس.. بيحقق بعض أمنياته.. بيواجه بعض مخاوفه.. يتكلم ويرد ويروح ويجي..
ويفاجئ بعد شوية وقت.. انه بيفتح عينيه.. وان نور الشمس رجع.. وان جسمه دبت فيه الحياة مرة أخرى.. وان رحلته الليلية الغريبة انتهت فجأة .. وان كل اللى حصله.. حصل وهو فى مكانه لم يتحرك منه.. وان زائر الظلام.. قد حلّ عنه..
الانسان القديم كان عاجز تماماً أمام الظاهرة دى.. عاجز عن فهمها.. عاجز عن تفسيرها.. وعاجز عن فعل أى شئ تجاهها.. الا الاستسلام ليها.. ومعايشتها.. ثم رسمها والتعبير عنها بأدوات بدائية جداً على جدران الكهوف.. ثم المعابد..
ثم..
المراكز البحثية..
علشان نوصل النهاردة لعلم كبير جداً.. فوق ما يمكن أن تتخيل..
اسمه علم النوم..
وعلم آخر أكبر وأوسع وأغرب.. لا يكف عن ادهاشك واثارة فضولك واستغرابك واعجابك..
اسمه علم (الأحلام)..
علم نفس الأحلام..
واللى قالنا احنا بنحلم ليه.. وبنحلم ازاى.. وبنحلم بإيه..
فتحلنا أبواب هذا العالم السحرى اللى بنزوره كل ليلة..
وكشف لنا جوانب تلك المغامرات الدرامية اللى بنخوضها، بعيون ترى وهى مغلقة.. وآذان تسمع وهى مصمتة.. وأجساد تطير وهى لا تتحرك من مكانها..
كشف لنا معانيه ورموزه..
وفك لينا.. بعض شفراته..
و.......
ماتيجوا نشوف..
***
خلينا نتفق على حاجة أساسية ومهمة: كلنا بنحلم.. كل يوم.. كذا مرة..
كونك تفتكر الحلم أو ماتفتكرهوش ده موضوع تانى.. لكن وبكل تأكيد.. كلنا -بمعنى كلنا- بنحلم كل يوم لمدة عشرين دقيقية كل ساعة ونص.. يعنى بنحلم حوالى ساعتين كاملين كل ليلة..
حضرتك بتقضى ما يعادل ست سنوات من عمرك بتحلم..
بتحلم.. مش مجرد نايم ) احنا بنقضى ما يعادل 25 سنة من حياتنا نايمين.. ده فى حالة متوسط عمر 75 سنة)..
ومش بس احنا -البشر- اللى بنحلم..
ده الحيوانات كمان بتحلم.. تصور!! كل الكائنات ذات الدم الدافئ بتحلم (القطط، الكلاب، الحصان..)..
والجنين فى بطن أمه بيحلم..
آه والله..
الجنين بيبدأ يحلم ابتداء من الشهر السادس..
طب وهما عرفوا منين يا دكتور؟
عرفوا منين ان الحيوانات بتحلم.. وان الجنين بيحلم.. وكل ده؟
أقولك..
الأحلام بتحصل فى مرحلة معينة من النوم اسمها REM sleep (مرحلة حركة العين السريعة).. بنقدر نعرف ان شخص ما (أو كائن ما) فى المرحلة دى دلوقت عن طريق جهاز اليكترونى معين بيقيس نشاط المخ أثناء النوم..
طول ما المرحلة دى موجودة وشغالة يبقى احنا بنحلم.. المرحلة دى مدتها 20 دقيقة كل ساعة ونصف من النوم..
أى كائن بيعدى بالمرحلة دى أثناء نومه.. بيحلم.. وأى كائن مش بيعدى بيها أثناء النوم.. مش بيحلم..
عن طريق قياس نشاط المخ أثناء النوم بالطريقة دى (وبطرق تانية)، قدرنا نعرف ان القطط بتحلم.. والفئران بتحلم.. وكل الكائنات ذوات الدم الدافئ بتحلم.. والجنين بيبدأ يمر بالمرحلة دى أثناء نومه ابتداء من الشهر السادس (قاسوا نشاط مخ الأجنة اللى بتتولد بدرى عن معادها)..
وأم الجنين.. الأم الحامل.. بتحلم ضعف عدد الأحلام اللى بتحلمها وهى مش حامل.. وكأنها بتحلم لنفسها وللى فى بطنها..
مذهول؟
طيب أذهلك أكتر..
احنا مش بس عرفنا ان كل دول بيحلموا..
داحنا عرفنا بيحلموا بإيه كمان..
عرفنا القطط بتحلم بإيه..
والفيران بتحلم بإيه..
وطبعاً الانسان بيحلم بإيه؟
طب ودى عرفناها ازاى؟
خد عندك يا سيدى..
فيه منطقة فى الجزء الخلفى من المخ اسمها Nucleus Coeruleus.. المنطقة دى وظيفتها انها تشل حركة جسمك وانت بتحلم.. تخلى عضلاتك مرتخية وغير قادرة على الانقباض والحركة.. وإلا..
عارف لو المنطقة دى ماشتغلتش إيه اللى هايحصل؟
أيوه.. بالظبط.. هاتمشى وانت نايم.. هاتقوم تنفذ حلمك وانت بتحلم بيه.. هاتبقى عامل زى اللى لابس جهاز VR.. عمال تضرب وتخبط وتلوح بايديك ورجليك.. واللى حواليك مش فاهمين ايه اللى بيحصل..
المهم..
لما بنقوم بتدمير أو ايقاف وظيفة المنطقة دى عند أى كائن.. ونحرره من الكونترول بتاعها.. بنقدر نعرف (أو بالأحرى نشوف بعيننا) هو بيحلم دلوقت بإيه..
لقينا القطط بتحلم انها بتطارد وتصيد وتاكل..
ولقينا الفئران بتحلم انها بتجرى وتستخبى وخايفة..
وهانتكلم عن أحلام البشر بعدين..
عارف مين مش بيحلم؟
السمك مش بيحلم.. والزواحف مش بتحلم.. وبعض الأدوية ممكن تخلى الانسان مايحلمش..
بس فى الحقيقة.. دى حاجة خطر جداً..
انك ماتحلمش.. ده ممكن يهدد حياتك.. وممكن يؤذى مخك..
يااااه..
تسمع عن ذاكرة السمكة؟
السمكة معندهاش ذاكرة.. فاقدة القدرة على تخزين المعلومات واسترجاعها.. علشان كده مش بتتعلم.. ودايما كل أجيال السمك الحالية والسابقة والقادمة بتقع فى نفس الغلطة.. وتسلم نفسها لنفس الطعم.. بنفس الطريقة: الشبكة.. والسنارة..
اللى مش بيحلم.. مش بيتعلم..
مش بس كده..
أحد وسائل التعذيب اللى كانت معروفة أيام النازية هى الحرمان من النوم.. انك تجيب حد وتسيبه صاحى طول الوقت.. وأول ما يبدأ ينعس ويعوز ينام.. تفوقه وتوقظه.. وتسيبه شوية.. أول ما هايقع فى النوم.. تصحيه تانى.. وهكذا.. عارف ده بينتهى بإيه؟
بيتجنن..
وده مش استعارة أو تشبيه بلاغى..
هو حرفياً بيتجنن.. بيبدأ يهلوس ويشوف صور ويسمع أًصوات مش موجودة..
وكأنه بيحلم وهو صاحى..
وكأنه بيعوض فقدان الأحلام أثناء النوم..
بإنه يحلم أثناء الصحيان..
برضه مش بس كده..
اللى بياخد أى دواء من اللى بيؤثروا على مرحلة الREM sleep وبالتالى يمنعوا الأحلام.. مخهم بيبدأ يتأثر.. وتبدأ الوظائف المعرفية عندهم تتدهور (الذاكرة- التركيز- الإدراك).. وكأنهم بيحصلهم حالة من التأخر الذهنى والعقلى.. لمجرد انهم.. مش بيحلموا..
يااااااه
الأحلام بتعمل كل ده؟
الإجابة لأ..
الأحلام مش بتعمل كل ده..
الأحلام بتعمل أكتر من ده بكتير..
الفص الأيمن من مخك بيشتغل أثناء الأحلام وكأنك صاحى بالظبط.. الفص ده هو المسئول عن الابداع والصور والألوان..
مخك بيستهلك جلوكوز وانت بتحلم قد اللى بيستهلكه وانت صاحى.. عملية الحلم بتحتاج طاقة رهيبة جداً..
علشان كده..
وللمفاجأة..
انت وزنك بيقل وانت بتحلم..
لأن عقلك شغال.. زى الدينامو الضخم..
عمال يولد طاقة.. والطاقة تتحول لخيال.. وصور.. وأًصوات.. وحكايات.. وأفلام..
- انت عارف الناس بتحب السينما ليه يا محمد؟
- ليه يا دكتور روبرت؟
- لأنها زى الحلم.. السينما زى الأحلام..
***
انت عارف ان الحلم ليه وظيفة؟
فى الحقيقة مش وظيفة واحدة.. هو ليه حوالى مائة وظيفة.. نعرف منهم عشرة مثلا..
احنا مش بنحلم وبس..
الحلم مش رفاهية..
الحلم مش صدفة..
الحلم مش مجرد ظاهرة بيولوجية..
احنا -حرفياً- لو بطلنا نحلم.. هانموت..
