كتب: محرر الأقباط متحدون
وجه الإعلامى أحمد سالم تساؤل لمحافظ الإسكندرية بشأن الحديقة الدولية التى تم إغلاقها منذ عام ٢٠١٨ وتحولت الأن إلى خرابة تسكنها الأفاعى والحشرات.
بخصوص اسكندرية عندنا شوية أسئلة في حاجة الي إجابات عاجلة من السيد المحافظ.....
ليه اغلقنا الحديقة الدولية والداون تاون من ٢٠١٨ و تحولت الي خرابة تسكنها الأفاعي و الغربان ؟؟؟
استفدنا ايه لما قفلنا كل المشروعات اللي كانت فيها و خربنا بيوت أصحابها اللي منهم اللي مات بالجلطة و اللي رفع قضايا في التحكيم الدولي ده غير آلاف العمال اللي اتشردوا دون توفير البديل ؟؟؟
و ليه تتحول الحديقة في المستقبل لمشروع عقاري و نحرم الطبقة المتوسطة من نادي لاجون و قاعات افراح مناسبة لدخولهم؟
لو المحافظة مضطرة لتأجير كافيهات الكورنيش لضعف مواردها ،طب ما كانت جددت عقود الداون تاون بالملايين و استفادت من عائدها مقابل منع الكافيهات علي الكورنيش؟؟
فين الهوية البصرية اللي سيادتك اتكلمت عنها في كوبري سيدي جابر اللي يستحق جائزة أسوأ مشروع معماري في العالم بالاكشاك اللي عليه و القهاوي الشعبية و الجراج المهجور و السيرك و غيرهم من منشآت أشبه بالمولد في منطقة كانت الارقي في المدينة ؟
يا تري الكافيهات اللي علي الشاطيء دي فين الصرف الصحي بتاعها و بتاخد مرافق منين ؟
ازاي نصحي الصبح نلاقي حديقة عامة في ميدان صغير جدا تحولت الي مطعم و كراسي و مطبخ وشواية وبرضو فين الصرف الصحي بتاعها؟
ليه سمحت بهذا العدد الرهيب من الكافيهات الشعبية اللي علي الكورنيش وبتعوق الرؤية رغم وعدك السابق بعدم تجديد العقود القديمة؟
هل تمت دراسة الأثر البيئي للألسنة البحرية اللي اتعمل عليها المشروعات الترفيهية وهل تتحمل الحالة المرورية كل المشروعات دي ؟
لو جالك مستثمر عايز يعمل مصنع في اسكندرية هتنصحه يروح فين و فين الأراضي المرفقة اللي عندك ؟
فين السياحة الأجنبية؟؟ فين اصلا السياحة القاهرية ؟؟ اسكندرية بقت مصيف شعبي بعد ظهور الساحل الشمالي و حتي اللي بيزورها من القاهرة بيجي ياكل سمك و كبدة كأنه رايح المدبح مش رايح مدينة كان اسمها عروس البحر المتوسط ،وبيمشي مقهور علي حالها و منظرها.
ايه رأي سيادتك في شوارع محطة الرمل و المنشية ولاجيتيه والجلاء ؟
ايه تعليق سيادتك علي تحول كينج مريوط الهادية الي منطقة ملاهي ليلية و قاعات افراح ولا شارع الهرم في عز مجده في ظل تأجير الفيلات و ازعاج جيرانها بشكل لا يطاق و بدون ضرايب او رسوم ؟؟
بعد التطوير الرائع لمحطة مصر ليه نطرح الباكيات بالأسعار دي و ازاي رجل بيفرش خضار هيقدر علي الإيجار ده ؟
فين مداخل و مخارج محور المحمودية اللي كان المفروض تتعمل عشان تفرغ الزحام من ابوقير و البحر ، و رغم جمال المحور الا انه تحول الي طريق دائري جديد و لم يحقق الهدف الأصلي من انشائه؟؟
لماذا لم تطرح مناطق البحيرات علي محور المحمودية للاستثمار و فتح أبواب رزق جديدة و لسحب الكثافات من الكورنيش كما خطط لها و لماذا لم يتم افتتاح الداون تاون الجديد حتي الآن لتوفير فرص عمل للشباب ؟؟
هل سيادتك عندك احصائية عن عدد الشركات والمصانع والمحلات اللي افلست في الفترة الماضية و هل تعلم كام شركة مقاولات توقفت تماما عن العمل وسرحت الموظفين والعمال ؟؟
مين صاحب التصميمات الشعبية المنتشرة علي جدران الكباري اللي خلت اسكندرية شبه كفر ابوطشت و فين أساتذة الفنون الجميلة من اللي بيحصل ده و مين اللي بيطلق الأسماء التجارية الركيكة علي المشروعات وفين اساتذة التسويق ؟
ليه البناء في المدينة في حالة شلل تام رغم انه القطاع القائد للنمو و بيشغل ملايين صعب جدا مشروعات الدولة تستوعبهم؟
لو المرافق ما تتحملش طب اشمعني الدولة بتبني عادي ولو عشان الزحام طب ليه وقفنا البناء في كينج مريوط؟
ليه حلال للدولة تبني في كينج مريوط و حرام علي أصحاب الأراضي اللي اشتروها زمان عشان ينقلوا فيها او يجوزوا ولادهم؟؟
فين اسكندرية الجديدة ال١٨٠٠٠ فدان و لو مش عايزين بناء داخل المدينة ايه الحل في أسعار الشقق اللي وصلت لأرقام خرافية؟؟
مشروعات مشاركة الدولة شروطها ٦٠% للدولة و ٤٠% للمطور العقاري يعني لو افترضنا ان متر المباني هايتكلف ٨٠٠٠ يبقي نصيب الدولة ١٢٠٠٠ و تكلفة المتر بدون أرباح ٢٠٠٠٠ يعني الشقة تبدأ من ٣ مليون جنيه ، طب ما نسيب الناس تبني أراضيها وفقا للقانون عشان أسعار الشقق ترخص ؟؟
ليه نسمح بارتفاعات تصل ل٣٠ دور في مشروعات الدولة و ٤ ادوار للقطاع الخاص في بعض المناطق و إيقاف نهائي في مناطق أخري و لو جالك مستثمر اجنبي عايز يعمل مشروع عقاري هتفسر له الوضع ده بإيه؟
ازاي حد اتولد في الفراعنة او زيزينيا او محرم بك او الابراهيمية هايقتنع ان ابنه يسكن في عبدالقادر و ازاي نعمل داون تاون و ممشي سياحي و شقق استثمارية في مشروع سكني بيشهد معارك يومية بالمطاوي و السكاكين و المئات من المسجلين خطر علي مسافة أمتار وفين الدراسة الاجتماعية ؟
الناس اللي اتنقلت من العشوائيات أخبارهم ايه، و ليه مش مبسوطين رغم الشقق الرائعة و هل قادرين يدفعوا الإيجار و المياه و الكهرباء بعد ما ارزاق معظمهم اتقفلت بالضبة و المفتاح ؟
ليه تراخيص بناء المدارس الخاصة موقوفة للسنة التالتة علي التوالي و هل تعلم أن ده هايعمل ضغط رهيب علي المدارس الحالية و هايرفع كثافتها او اسعارها و ليه ندي الفرصة لمروجي الشائعات يقولوا ان الدولة تعمدت إيقاف التراخيص عشان بتبني مدارس دولية جديدة في مشروعاتها الفاخرة ؟؟؟
ليه التوكتوك بقي بيتجول بحرية في كل الشوارع الرئيسية و كأنه أمر واقع ؟؟
انا اللي مزعلني ان الدولة أنفقت مليارات الجنيهات علي الاسكندرية ولم تبخل عليها بعد سنوات طويلة من الإهمال و اقامت شبكة طرق رائعة آخرها محور التعمير ،لكن بعض اللمسات و الأخطاء في الإدارة و الذوق العام تهدر كل المجهودات دي .....
