إحسان ترك: محمد رمضان بعتلي شغل.. وقالي أنت أبويا

 

وتحدث الفنان إحسان ترك عن كواليس مقابلته لـ الفنان محمد رمضان، في تصريحات خاصة لـ القاهرة 24، وذلك بعد استجابة الفنان محمد رمضان، قائلا: كلموني الصبح قالولي تعالى اللوكيشن علشان محمد رمضان عايزك، ومحمد ده  يعتبر ابني، وروحت وادوني شغل وقابلت محمد، وربنا يصلح الحال.

 

وأضاف إحسان ترك: أول ما قابلته خدني بالحضن، وقالي ينفع كده يا عم إحسان ده أنت أبويا، ومحمد راجل جميل، وليا علاقة بيه من زمان، وديه أول مرة أقول الكلام ده بعد آخر عمل اشتغلناه مع بعض أنا ومحمد.

 

وعن الانتقادات التي يتعرض لها الفنان محمد رمضان، قال إحسان ترك: أنا مقدرش أدخل في شخصيته، ومليش حكم عليه، كل واحد ليه عقله وده راجل متعلم، وعارف يسوق نفسه، وهييجي عليه لحظة ويحصل معاه زي ما حصل معانا، شغلتنا ملهاش أمان، محمد إنسان وتعب في حياته وجاهد وكافح وعمل حاجات كتير علشان يوصل إلى اللى هو فيه، ولو فتحت محل ومعملتش تسويق ليه هيتقفل.

 

 واختتم الفنان إحسان ترك حديثه عن دوره في مسلسل العمدة مع محمد رمضان، قائلًا: هو دور مش كبير أنا طالع معلم معاه وبيهددني، تاجر من التجار اللي بيتعاملوا معاه.