رفضت الفنانة لقاء الخميسي حملات التجريح والإساءة الشخصية لنجوم الفن عبر صفحات مواقع التواصل الاجتماعي، وطلبت من جمهورها إبداء بعض الاحترام للمشاهير، والتوقف عن إهانة النجوم، وأكدت أن الفنان يواجه نفس المعاناة التي يواجهها المواطن العادي من أجل الصمود أمام صعوبات الحياة المالية والاجتماعية والنفسية.
لقاء الخميسي نشرت مقطع فيديو من خلال خاصية الاستوري عبر حسابها الشخصي بموقع انستغرام، طالبت فيه جمهورها باحترام آرائها، وقالت: رجاء من كل الناس اللي بتتابع السوشيال ميديا.. اللي بيحب حد يدخل عنده ويقوله كلمتين حلوين أو يصمت.. مبتحبش متقولش ممكن نختلف في الآراء، لكن لازم نتعلم إزاي نحترم الاختلاف.
تابعت قائلة: ياريت نبطل نهين بعض، ونرفض أفكار بعض كل واحد زي ما تربى، وكل واحد وثقافته وكل شخص ليه تفاصيله ومعتقداته وأفكاره وثقافته، فلازم نحترم بعض على قد ما نقدر، ولا يصح أن أهاجم حضرتك.
واختتمت رسالتها بقولها: الممثل عنده نفس التفاصيل اللي بتمر بيها، أزمات نفسية ومادية وعائلية ومشاكل ومنحبش نوريكوا مشاكلنا، احنا موجودين في الدنيا علشان خاطر نبسطكم ونفرحكم ونقدم لكم محتوى يغير مودكم.
وأكملت: إحنا بنيجي على نفسنا علشان نبسطكم، وبنحب شغلتنا وبنحبكم، فرجاءً حبونا شوية وأدونا هوا، وشوفونا بني آدمين طبيعين، عندنا مشاكل وصدقوني مفيش حد في العالم معندوش مشاكل، كل واحد ربنا بيديله على قد قدراته، الرحمة حلوة ياجماعة.
وسبق أن تفاعلت لقاء الخميسى، مع تعليق لأحد متابعيها تضمن بيت الشعر الشهير " إنما الأمم الأخلاق ما بقيت فإن هم ذهبت أخلاقهم ذهبوا"، وعلقت عليه مؤكدة أننا أصبحنا فى حاجة إلى إعادة إصلاح وتهذيب للنفوس.
وكتبت لقاء، عبر صفحتها الرسمية على موقع الفيس بوك: فى صديق للصفحة كتب تعليق رائع: إنما الأمم الأخلاق ما بقيت، فإن ذهبت أخلاقهم ذهبوا.
وتابعت: للأسف الاخلاق بقت بدعة وبقى الطبيعى اختلاق المؤمرات والكذب والادعاءات الباطلة وأيا ما يكون يفترض افتراضات من عقله المبدع اللى صورله أشياء يعلم الله وحده من أى مكان بدأت وسوف تنتهى!.
أضافت: أى حد يحب يقول أى حاجة وهو ولا فاهم فيها ولا عنده إثباتاته يطلع ينور ساحة الحياة ويدعى بالباطل على أى حد لمجرد إشفاء غليله وأحقاده اللى كانت نتيجة فشله فى إثبات ذاته ونجاحه، فيقرر أنه يشبع إحساسه الداخلى بالضعف والفقر الإنسانى والعملى ويتهم الآخرين بالسوء.. لنا الله فعلا".
