كتب: محرر أقباط متحدون
قال النائب الدكتور ايمن ابو العلا عضو مجلس النواب" كلنا شفنا وتابعنا الفترة اللى فاتت قصة "البطلة المزيفة" اللى ادعت كذبا إنها أنقذت أسرة من 6 أفراد من الغرق بمفردها، وشفنا إزاي اهتمت بيها وسائل الإعلام بشكل كبير، قبل أن يتبين الجميع إن الموضوع كله ليس سوى كذبة ما حصلتش أبدا..
طبعا هناك هجوم قوي على هذه السيدة الآن، لكن أعتقد إن الحل مش هو الهجوم، بل "العلاج"، لأن ما تعاني منه هذه السيدة هو ما يسمى بـ "اضطراب الكذب القهري"، أو "الميثومانيا"، وهو اضطراب نفسي وسلوكي وعقلي معترف بيه من مؤسسات الصحة النفسية على مستوى العالم.
دليل الأمراض النفسية بيوصف لنا بشدة حالتها ، فبيقول إن الشخص المريض باضطراب الكذب القهري ده، غالبا حديثه عادةً يتمحور حول ذاته ، حيث نلاحظ تحدثه عن بطولاته و شجاعته (انقذت 6 افراد بنفسها وبدون مساعدة أحد).
هل هي بتعمل ده باختيارها؟، لأ للأسف الشديد، فى حالة مرضى الكذب القهري فالشخص المريض بـ"الميثومانيا" ما يقدرش يسيطر على نفسه، بل لو رحنا دلوقتي وكلمناها وقلنا لها إيه اللى انتي عملتيه ده، فهتلاقيها لا تشعر بأي تأنيب ضمير، بل كمان ممكن تجادل إن معاها حق إنها عملت كده ، في الأغلب دي مش أول كذبة ليها ، ومش هتكون الأخيرة، والحل مش إننا نسيئ ليها، أو نقول عليها بطلة مزيفة، لكن الحل يتلخص في علاجها نفسيًا رحمة بيها وبالمجتمع.
