حقق مسلسل «بالطو» ردود أفعال واسعة على مواقع التواصل الاجتماعى، خاصة بين الأطباء، نظرًا لأنه يناقش مشكلات ومواقف مروا بها على مدار عملهم.

ويعتبر «تكليف الوحدة الصحية» وما يحدث به من مواقف، من أبرز ما سلط المسلسل عليه الضوء، وناقشها فى قالب كوميدى ساخر، تفاعل معه الأطباء بشكل واسع على صفحاتهم، وباتوا يسردون المواقف المشابهة للمسلسل التى حدثت معهم على أرض الواقع.
 
ومن أبرز ما كتبه الأطباء، حساب يحمل اسم «محمود عزت»، كتب عن موقف مر به فى تكليف الوحدة الصحية «شفت أول حلقتين من مسلسل (بالطو) ولذيذ جدا، طبعا الدكاترة هيشوفوا إن الوحدة الصحية اللى دكتور متورط فيها دى جنة بالنسبة للوحدات الصحية فى الواقع، أنا حصلى موقف شبه اللى البطل اتعرض له بالظبط، جالى وحدة صحية بعيدة فقررت أستقيل من الوزارة كلها، الموظف قالى روح استلم بس وبعدين استقيل براحتك، قلت له لا مش عايز أستلم بس ممكن اعمل لك محضر إثبات حالة إنى جيت وانت رفضت لإنى كده هيترفع عليا قضية التهرب من التكليف، فمضى الاستقالة وأنا واقف قدامه فى صمت».
 
بينما قال حساب يحمل اسم «مريم»: «مسلسل بالطو معبر عن تكليف الحكومة لدرجة إنى أول ما استلمت كانوا بيقنعونى أبقى مدير الوحدة برضو وإن الموضوع بسيط وكده»، بينما قال حساب باسم «نور»: «الوحدة الصحية بطرشوخ الليف، الدكاترة لو قررت تكتب اسم الوحدة اللى جالها فيها التكليف هنعرف أماكن فى مصر عمرنا ما سمعنا عنها قبل كده ولا هنسمع»، بينما كتب آخر: «خالد الصاوى صورة طبق الأصل لدكتور الوحدة الصحية فى الموقع عندى»، وطبيب آخر وافقه فى الرأى قائلًا: «خدت بالى إن أول وحدة صحية رحتها فى التكليف لقيت فيها أنا كمان الفنان خالد الصاوى بنفس الشكل والهيئة وطريقة الهزار».
 
وكتب حساب باسم آية عبدالعاطى: «اتبسطت أخيرا لما لقيت حاجة زى مسلسل بالطو بيحكى عن معاناة الدكاترة فى التكليف وواقع الوحدات الصحية، وناقل الواقع بالملى إلا حاجة واحدة وقعت منهم، وهى إن شكل الوحدة أصلا نضيف وأدوات الأسنان مبنلمحهاش فى الحكومة من أساسه».