هناء ثروت
حقيقي الكلام مر ومالوش أي طعم، ومفيش كلام أصلًا يوفي الحدث قدره، وكأن مجتمع بكل هيئاته تآمروا على طفل لا حول له ولا قوة، والاجابة معلش يا جماعة خطأ في الاجراءات، طيب ماشي انا معاكم ان في خطأ في الاجراءات، ارعف بس الخطأ دا يتصلح في وقت اد ايه؟ وهل النتيجة اللي احنا فيها دي تساوي فعلا خطأ الاجراءات؟ انتوا بتتكلموا بجد يا جماعة؟ هو اللي حصل دا حقيقي؟ اكتر من سنة والولد الصغير بعيد عن بيته وطريقة التربية اللي اتعود عليها وبعيد عن حضن امه وابوه .. ايوة امه وابوه هو انتم فاكرين انه ابن حقيقي للست اللي رمته وهو حتة لحمة حمرا واللي انا واثقة تمام الثقة انها على علم بكل اللي حاصل ولا الأب اللي عمل عملته وساب ابنه لمستقبل مجهول لأنه أجبن من أنه يعترف بأبوته للطفل دا؟ الام والاب الحقيقيين اللي اخدوه وحنوا عليه وراعوه بكل أمانة ومجاش في بالهم ان طمع الدنيا ممكن يبقى نتيجته ضياع الطفل دا.
الغريب بقى اننا بنسمع بقالنا سنين عن روح القانون وان ياما قضاه فضلوا روح القانون عن القانون طالما مفيش أذى ممكن يحصل او ضرر، وايه الضرر في ان الولد يفضل في حضنهم لغاية ما المحكمة تحكم، ليه الولد بس هو اللي يدفع التمن ويكون الضحية؟ ايه اللي ممكن يحصل لو الولد فضل معاهم وخدوا كافة الضمانات والاجراءات القانونية اللي انتوا عايزينها، ليه كل حاجة كدة تبقى بصعوبة وبطلوع الروح، دا طفل بريء مالوش أي ذنب في العك دا، وبعدين بقى نيجي للسادة المحامين وأن أجهل حقيقي بالشق دا هو انتوا كنتوا عارفين ان المحكمة دي غير مختصة؟ وكأن واحد اسنانه بتوجعه راح لدكتور نساء وتوليد مثلا، والكلام دا عشان نعرفه ياخد وقت اد ايه يعني لو عايزين نعرف التخاذل دا من مين نسأل مين؟ من المحامين ولا القضاة؟
يا سادة الرحمة فوق العدل، خصوصًا لو الرحمة دي على طفل بريء لا حول له ولا قوة، يا سادة المجتمع بيئن أصلًا من أطفال الشوارع اللي ماكانش لهم حظ زي شنودة ومالقوش أسر تكفلهم، نقوم احنا وبكل جبروت ناخد واحد منهم حظه ساعده ولقى بيت يضمه وحضن يساعه عشان شوية اجراءات، لك الله يا شنودة لك الله
