كتب - محرر الاقباط متحدون
بكت سيدة مسنة مريضة لا تستطيع الحركة، وقالت انها تعيش مأساة حقيقية جراء جحود ابناءها، وان من سماتهم الأنانية لذلك القوها في الشارع بعد طردها من شقتها .
والتقت الإعلامية مني عراقي، مع السيدة وحفيدتها وزوج حفيدتها الذي قال :" جدة زوجتي تبلغ من العمر ٨٦ عاما ، وتعرضت للضرب على يد ابناءها الاربعة وبعدها القوها في الشارع.
وكشفت السيدة :" عندي ٤ ابناء (٣ ذكور وبنت) ، ربيتهم وعلمتهم وجوزتهم، ابني الصغير اخدتله شقة في الخصوص عشان يتجوز فيها وجيبتله انتريه ومطبخ وسفرة وكل اجهزة الكهربا واديته الدهب بتاعي للشبكة .
وتابعت :" وقعدته معايا وقولتله هكتبلك عقد الشقة باسمك عشان ابنك يبقى وريثك عشان انت وريثي وقولتله اوعى تفرط فيها قالي هيحصل ياماما انا اشيلك على راسي.
مضيفة :" وبعد ما كتبتله العقد باسمه واتجوز واحدة معندهاش ضمير فضلت تقسيه عليا لحد ما طردني وكان يشتمني ومؤخرا اتهجم عليا وضربني في رجلي وانا عاملة عملية مركبة مسامير وشريحة لما ضربني في رجلي المسامير فكت.
وانهارت باكية :" جه اول امبارح وجاب اخواته وطردوني كلهم برة على ما جيت من القسم لاقيت هدومي مرمية في الشارع.
وابدى زوج حفيدتها اندهاشه من هذا الجحود قائلا :" في جملة سمعتها امبارح ومش مصدق انها تتقال، ولادها وهما بيرموا هدومها قالوا ارموا الزبالة دي برة على الست اللي ربت.
موضحا :" متجوز حفيدتها بقالي ٢٠ سنة، وشاهد انها جوزت وربت دفعت وخدت شقة والعداد لسة باسمها تبقى زبالة ازاي الام تبقى زبالة ازاي انا والدتي متوفية لو عايشة كنت بوست تراب رجليها مش ارميها في الشارع اللي حصل لجدة زوجتي من عيالها من علامات الساعة.
وواصلت السيدة :" حبسوني قالي الحمام ده هتدخليه بحساب انا صاحب البيت والامر ليا، وكلامه خلاني الطم على وشي وقلت انا ندمانةاني كتبت له الشقة باسمه تتحكم فيا وتقول محدش هيدخل الا بامري انا .
ولفت زوج حفيدتها :" الست دي مش محتاجة مساعدات ولا اي حاجة في الدنيا المعاش بتاعها مكفيها احنا بنطلب منك طلب واحد واخدين البطاقة بتاعتها وفيزا المعاش بتاخد علاج للقلب ومش قادرين نجيب العلب لانه غالي جدا وبنشتري شرايط طب بعد ما تخلص، ولادها سارقين كمان الدهب بتاعها وفلوسها.
واكدت الام :" اهم حاجة الفيزا لازم تبقى في ايدي انا.
وضجت مواقع التواصل الاجتماعي بتعليقات استنكر اصحابها جحود ابناء هذه الام وقسوتهم عليها ونكرانهم لفضلها عليهم :
-هيه الأم تترمى اتنمى لو امى تكون معنا الله يرحمك يا امى الحبيبة.
-لا حول ولا قوه الا بالله العلي العظيم وحسبنا الله ونعم الوكيل فيهم.
-اللهم لاحول ولاقوة الا بالله، كما تدين تدان الله يمهل ولا يهمل سبحانه وتعالي الام لاتقدر بثمن.
-اعتقد مصر دولة قانون ويحقون الحق ورجالات الامن والشرطة عندهم امهات اكيد راح ياخذون حق هذه الام المسكينة التي المتنا كثيرا ووجعت قلوبنا الله شاهد.
-حسبي الله ونعم الوكيل من زرع شيء لابد منه هيترد بكره هيرموهم عيالهم في الشارع.
عند الله تلتقي الخصوم في الدنيا ما في حق برجع لأصحابه الحق عند رب العالمين.
