هناء ثروت
لازلنا في حوار اختفاء البنات، كل شوية نسمع عن بنت اختفت ورجعت وغيرها اختفت ورجعت، ونصرخ وبعدين نهلل، ويتكرر الموضوع وتتكرر الحكاية ومحدش عارف اولها من اخرها، ومابين متضامن ومتعاطف ومابين رافض وساخط هنا المشكلة، الموضوع زاد عن حده جدا واصبح يُشكل كارثة اخلاقية وليست طائفية. ليه؟ هاقولكم ليه.
تعالوا ناخدها واحدة واحدة وطبعا مش هاذكر قصة بعينها، لكن اغلب حكايات الستات والبنت المختفيات واحدة، تبتدي بالحقوا فلانة اتخطفت وبعدين فلانة سجلت فيديو بتغير فيه دينها وبعدين لا دي فلانة رجعت ونقول طيب الحمدلله انها رجعت، طيب هي اتخطفت؟ مين اللي خطفها وازاي يسيبوه من غير حساب او محاكمة وبنكتفي بالحمدلله؟ حاجة غريبة صح؟ ولما نيجي نسأل عن الحكاية نعرف ان البنت دي او السيدة دي عندها مشاكل في بيتها ، يا اما مع ابوها وامها ، يا إما مع زوجها، يعني هي ما اتخطفتش؟ لا في اغلب القصص هي مشيت بمزاجها وغيرت دينها بمزاجها ليه؟ هروب من القسوة العائلية، وارجوكم خلونا نقول المشاكل بأسمها عشان نقدر نحلها وبلاش حكاية الاختطاف والاضطهاد دول عشان بقوا ماسخين اوي.
لما ناقشنا مشاكل الانتحار للفتيات اشرنا الى المشاكل العائلية بموضوح عشان نقدر نلاقي سبب المشكلة، ليه مش عايزين نعترف ان عندنا مشكلة اسمها مشاكل عائلية تؤدي الى هروب الفتاة او السيدة وخروجها من الدين للنجاة من المعاملة القاسية؟ هو دا عيب ؟ لأ ، العيب اننا نداري المشكلة ونكتم عليها فتحصل مشكلة اكبر، وبعدبن نداري الهروب بالجملة الحلوة "الخطف"، يا جماعة كدة المشكلة عمرها ما هتتحل وهاتكبر وهاتبقى كارثة وهاتطول اغلب البيوت.
والحل ببساطة ان الاب والام يقربوا لبنتهم، يقبولها، يحبوها، يأدبوها بالحب مش بالقسوة، يطبطبوا عليها، يدوها حقها في الغلط لانها لما تغلط وتتعلم من غلطها هاتكسب مش هاتكرره، ليه واخدين ان التربية قسوة واكسر للبنت ضلع يطلعلها 24 ، الواقع قال لما تكسر للبنت ضلع هاتخاف على بقية ضلوعها وتسيبك وتهرب، سواء بقى تهرب وتعيش لوحدها دي لو مستقلة ماديًا، او تهرب مع اول ايد هاتطبطب عليها، مافيش حل تالت.
نداء لكل اب وكل ام، لو مش عارف تربي تربية صح ممكن تتعلم وتشتغل على نفسك، اتعلموا اعتذروا لاولادكم لو غلطوا في حقهم، اتعلموا احضنوهم وسامحوهم وطبطبوا عليهم،
نداء خاص للاب، انت أول راجل في حياة بنتك، حبها الاول والاخير، سندها وضهرها وحاميها من الدنيا وغدرها، أنت حضن وكتف تسند عليه راسها، باختصار انت سوبر مان لبنتك اللي حاسة انها ممكن تواجه الدنيا كلها بيك، خليك اد المسئولية وخليك سوبر مان مش هاتخسر، هاتكسب حبها وثقتها وانت عايش، وهاتكسب دعواتها ليك وانت في العالم الآخر، انا كنت في المقابر من مدة قريبة لوداع أحد الاحباء وقريت شاهد قبر مكتوب عليه "هنا يرقد أطيب أب في الدنيا الأيد الحنينة والقلب الطيب والحضن الواسع" تأملت العبارة وانا بتخيل الاب دا تعب ازاي عشان تبقى العبارة دي من نصيبه.
اتعبوا لأجل أولادكم وتعبكم مش هايروح على الفاضي، ربنا يحافظ عليهم ويحميهم
