كتب - محرر الاقباط متحدون
شن المغني شادي شامل هجوما على الفاطرين في رمضان، وكتب عبر حسابه على فيسبوك :" عيب لما تكون راجل شحط و ست شحطه تفطروا في نهار رمضان عن عمد بدون اسباب مرضية ، والله ده انا اعرف اخوه مسيحين بيصوموا معانا عيب يا حبيبي عيب يا حبيتي.
مضيفا :" انا مش ربنا و لا بحكم علي حد و لا بحاسب حد بس مش عيني عينك كده.
واستنكر عدد كبير من رواد مواقع التواصل هجوم شامل على الفاطرين ، واتهموه بمغازلة المزاج السلفي وممارسة الازدواجية والنفاق كونه هو يفعل ما يحلو له حيث يرتدي حلق ويرسم الوشم على ذراعه، بينما هو يتدخل فيما لا يعنيه .
ليرد في منشور جديد :" عايز أقول حاجة أنا بشر وبغلط وبتوب و بغلط و ارجع اتوب ومتصالح مع نفسي وعارف اللي عندي بس برضو بغير على ديني، حريتك إنك تعمل الحرام دي بتاعتك بس لما تعمله لازم تبقى عارف إنه برضو حرام وغلط.
وتابع :" أما كونك عايز تفرض على الناس وضعك وفكرك ومش قابل إن غيرك يبدي رأيه في شيء غلط بيتعمل فإنت كدا ديكتاتور، الغلط الفردي شيء وإننا ندافع عن تعميمه في المجتمع وإننا منحترمش الوضع العام في المجتمع دا شيء غير حضاري قبل ما يكون غير ديني.
كما اضاف :" أنا راجل متحضر وعشت في كل الدول برا وشفت الناس برا قد إيه عندهم فكرة احترام تقاليد المجتمع حتى لو هما في أشخاصهم مش ملتزمين بيها.
وواصل :" فياريت نهدى على بعض ومش من الاحترام إننا نكون بتتكلم في قضية فتلجأ للتشويه بقضية تانية لأن دا معناه إنك مفلس فكريا ومش لاقي رد مقنع فتتجه لتشويه اللي بتتناقش معاه، ودي طريقة بقت سخيفة وتدل على عدم رقي وعدم فهم وقلة وعي.
وعلق حساب :" وهو البوتوكس والفيلر مش عيب يا شادي يا حبيبي؟، ليرد على صاحبة التعليق :" لا مش عيب .
وكتب حساب آخر :" انت لابس حلق ! .
ودافع عنه الداعية الازهري عبدلله رشدي وكتب :" أحسنتَ كلامك صحيح إحنا فعلاً بنغلط وبنتوب لكن مش هندافع عن الغلط بدعوى الحرية الموهومة.
وابدى شامل سعادته بتعليق عبدلله ورد عليه :" حبيبي يا شيخ عبدلله يا محترم يافاضل احسنت .
وكتبت ماهي نور :" هو ربنا ادي حق اي شخص يفطر لو مريض لو مسافر لو ع حرج من صيام لو حتي هو مش عايز يصوم من حق اي حد يعمل الا هو عايزه الا بيصوم بيصوم لنفسه ولي بيفطر بيفطر لنفسه وعلينا نتقبل كل ناس .. الاخواه مسحين من حقهم من حقهم ياكله ويشربه قدامنا الا عايز يفطر من حقه عادي كل واحد هياخد ثوابه ع قد نيته.
مضيفة :" من حقي اقول رائي انه ده صح من حقك تقول رائيك ضد ده مهم الاهم ربنا خلق الكون ده بختلفنا ف دين وشكل وتفاصيل والاراء الاختلاف ده عشان نتقبل بعض.
وعلقت كريستين :" بص يا شادي انا ماليش اني اتكلم بس انت برضو ماتعرفش ظروفهم وارد ان يكون عندهم اسباب مرضية فعلاً تمنعهم من الصيام فا بلاش تحكم عليهم منهم لربنا هو يحاسبهم.
واتفق الشيخ عبدلله رشدي مع تصريحاته وكتب :" كلامك صح عيب وحرام لأنه الإفطار بلا عذر في رمضان كلام ربنا والواجب على الناس هو الالتزام بالقانون والقانون الإلهي هو أسمى القوانين.
كما علق حساب :" الصيام عباده لله وربنا اللي بيحاسب ومحدش يعرف ظروف التاني مش يمكن معاه رخصته اللي ربنا ادهاله احنا بقي هندخل جوه نوايا وظروف الناس اللي لا يعلمها غير ربنا ونعمل عليهم حكام واحنا كلنا عيوب اساسا وفي الاخره كل واحد هيقف قصاد ربنا بعمله يعني الواحد يركز في اعماله اللي هيتحاسب عليها لوحده.
وكتب احمد :" بصراحة لا اكراه في الدين...كل واحد حر ..لا انا ولا انت اوصياء على افعال الناس او عبادتهم من شاء فليؤمن ومن شاء فليكفر.
ووجهت له داليا رسالة :" استاذ شادي لو مش حنضايق روح الشيخ اللي جواك معلش صوم وانت ساكت متنظرش على غيرك ، رمضان كريم .
