كتب - محرر الاقباط متحدون
أبدى الطلاب المسيحيين واسرهم غضبهم الشديد، من اعلان الجامعة الحديثة للتكنولوجيا والمعلومات يوم الأحد الموافق 16/4 موعد عيد القيامة المجيد يوم دراسي عادي، في عدم مراعاة للأعياد المسيحية.
وجاء بنص بيان الجامعة : إعلان هام ، تعلن إدارة الجامعة بأن يوم الإثنين المقبل الموافق 17/4 هو إجازة رسمية لجميع الكليات والإدارات المختلفة بمناسبة أعياد شم النسيم.
علماً بأن يوم الأحد الموافق 16/4 يوم دراسي عادى بسبب الامتحانات على حسب الجداول الموضوعه لكل كلية كل عام وأنتم بخير ونتمنى لكم النجاح والتوفيق.
واستنكر المفكر كمال زاخر، عدم صدور قرار بتعطيل الدراسة يوم عيد القيامة وكتب عبر حسابه الرسمي على فيسبوك :" عندما يغيب الوعى الدستورى والإنسانى لحساب الجهل بتكوين الشعب المصرى ... ليس تطرفا بقدر كونه جهلاً وغباوة.
كما علق وجيه ميخائيل :" جامعة MTI تضع امتحانات لطلابها يوم عيد القيامة. ألا يوجد عاقل في هذه الجامعة؟ هل فقدوا الحسّ الإنساني والوطنيّ لهذه الدرجة؟!.
وفيما يلي بعض تعليقات الطلاب الغاضبون :
براحتكم احنا كدا كدا مدين لـ نفسنا اجازه .
احلي مسي علي اللي مشرفنا برة التصنيف العالمي .
ياخسارة كان نفسي اعيد كدا مضطر انزل الجامعة.
مضطرين ننزل للاسف عشان خاطر الامتحنات علي حسب الجداول الموضوعة لكل كلية .
مش ممكن هعيد إزاي كدا .
انا مشفتش قلة ذوق كدة فى حياتى و الله.
يعني ايه معرفش انبسط بالعيد عشان الجامعة مش عارفة تدينا يوم واحد اجازة بالرغم انه اجازة رسمي في كل حتة اصلا.
مكسوفين تقولو اجازة عيد القيامه ولا اي ؟!
مش هنطلع خطوة لقدام .... ربنا يشفى دماغكم.
مش فاهمة اليوم ده هو اللي كان هينهي العالم يعني لو اتاخد اجازة ؟ انتوا بتستسهلوا بدل ما تعيدوا تنسيق الجداول؟ دي مش مشكلتنا ولا ذنبنا ان ادارة الجامعة فاشلة.
طبعاً ازاي ندي أجازة للمسيحيين في عيدهم انتوا عايزين الجودة تاكل وشنا ولا ايه.
محدش مستنى منكم اجازة احنا مأجزين عشان عيد القيامة.
دا هو احترام الغير و الاديان ي دكتور، فين الدوله من العبث دا اللي بيحصل داا!؟ يوم الاحد دراسه وامتحانات حسب جداول كل كليه.......ولا كان فيه مسيحيين معاهم ف الجامعه، احنا واخدين اجازه من نفسنا نزلوا اعلانات براحتكم بقا.
هتموتنا من الضحك ف مره.
مافرقتوش عن الارهابيين في حاجه واللى عمل كده اكيد اخوان.
جامعة متعصبة تزرع الفتنة بين المواطنين.
جامعة تعطي أجازة بمناسبة شم النسيم عيد فرعوني مع العلم انه معندناش فراعنة عايشين معانا دلوقتي .. و لا تعطي أجازة بمناسبة عيد القيامة للمسيحيين مع العلم انه في مواطنين مسيحيين عايشين معانا في البلد دي دلوقتي،
لو إدارة الجامعة مثيرة الفتنة مش عارفة ان ده عيد القيامة نعرفها .. نشرح .. عيد القيامة ده المسيحين بيعيدوا بيه كل سنة عشان في اليوم ده قام السيد المسيح من الموت .. بعد ما اليهود و الرومان صلبوه و كانوا فاكرين انهم لما يضطهدوه لحد الصلب هايقضوا عليه و على رسالته .. بس المسيح قام من الموت و حي الآن بشهادة جميع الأديان و رسالته لم يتم القضاء عليها لكنها بالعكس انتشرت كالنار في الهشيم في العالم كله ومازلت تنتشر حتى الآن،
التمييز لم يوقف رسالة المسيح .. الإضطهاد لم يوقف رسالة المسيح .. حتى الموت الذي هزم جميع البشر و الانبياء لم يهزم المسيح ولم يوقف رسالته .. المسيح قام .. بالحقيقة قام .. كل سنة وانتو طيبين،
كل الطلبة المسيحيين يعملوا وقفه قدام ادارة الجامعه المتعصبة دى و محدش يروح يوم العيد .... كلة يقعد في البيت.
