كتب - محرر الاقباط متحدون
انتهاكات واعتداء بالضرب ومشاهد غير آدمية، هكذا وصف مجموعة من اعضاء جروب شباب المعادي الذين تطوعوا لتقديم مساعدات للمسنين في دار "ام كلثوم" بمنطقة حلوان اوضاع النزلاء بالدار .
وروى محمد اسامة أحد شباب المعادي لـ"العربية مصر" تفاصيل المشاهد المؤسفة في الدار وآخر التطورات.
وقال اسامة :" كنا علمنا من الدار انهم بحاجة لمساعدات من بينها عدد وجبات افطار للعمال والنزلاء ، بامبرز ، ادوات ونظافة .
مضيفا :" بعدها نفذنا زيارة للدار لتسليم المساعدات التي طلبوها، وفوجئنا باختفاء مساعدات بعد تسليمها لهم .
وتابع موضحا :" موظفين هناك بيحتفظوا بالوجبات لنفسهم، وفوجئنا بوجود ناس تعبانة ومفيش دكتور بيشوفهم.
لافتا :" كلهم عندهم قرح فراش، السراير مش نضيفة، وبيتعاملوا معالمة وحشة، وفي منهم اتعرضوا للضرب قدامنا وفي ناس منهم اتعاملوا معاملة غير ادمية.
كما اوضح :" في نزلاء عندهم مشاكل نفسية وبيضحك عليهم في الدار .
لافتا :" في نزلاء قالولنا متسيبوناش هنا خدونا معاكوا، والرجالة من النزلاء انا شفتهم بنفسي حالتهم تصعب على الكافر.
موضحا :" السراير بتاعتهم متبهدلة دم وعندهم قرح ومش بيتحركوا ومتبهدلين ، شفا الاكل مرمي على السراير جنبهم يعني متبهدلين جدا .
لافتا :"ابلغنا وزارة التضامن الاجتماعي، بهذه الانتهاكات ضد المسنين من نزلاء الدار، وبعدها شنت الوزارة حملة تفتيش على الدار .
موضحا :" تم توقيع جزاءات على البعض وفصل اثنين من الموظفين، كما قامت الوزارة بتعيين موظفين بدوام كامل لمراقبة الوضع يوميا .
وتداول رواد مواقع التواصل الاجتماعي ، منشور "جريدة المعادي اليوم" الذي يتضمن انتهاكات بحق نزلاء دار ام كلثوم بحلوان، وجاء بنصه :
انهاردة جروب شباب المعادي Maadians كان عامل زيارة لدار مسنين علشان يدخل الفرحة عليهم بس للاسف حصل اللي مكنش متوقع ابدا من الدار، الدار اسمه دار ام كلثوم (عقيلة السماع ) ف حلوان.
عرفنا من ناس انه محتاج تبرعات وحاجات كتير جدا قررنا نظبط يوم ونروح زياره ومعانا وجبات ونفطر معاهم وتم الاتفاق مع مديره الدار وتم ابلاغنا بالعدد ف الدور الارضي ٤٥ واللي فوق ٨٥ .
وطبقا لكلامها انها عملت تصريح لينا بعدد من ٢٠ ل ٢٥ فرد اللي اتوجد ف الدار اسوء معامله للنزلاءالمسئولين عن الدار بيضربوو النزلاء عدد من الحالات عندهم قرحة الفراش دم ع السراير ريحة وحشه جداااااااااا.
سرقو وجبات ومن كلامهم عشان يقدموها بكره وكان فيه عصير بيتوزع علي النزلاء مكنش فيه اي اهتمام ولا معرفة اي حد ممكن يكون عنده سكر .
فيه ناس منهم مرضى نفسيين والمسؤولين عنهم غير مؤهلين للتعامل معاهم ، واحدة كانت بتقول عايزة ابويا والست المشرفة قالتلها تعالى اطلعك برا شوية لابوكى وادخلك تانى وبتغمزلنا انها يعنى بتضحك عليها وبتقولنا عشان هى تعبانة نفسيا بس وطبعا بالمنظر دا اكيد مابيعرضوهومش على اخصائيين او دكاترة نفسيين.
طبعا مكنش ينفع نصور الحالات نفسها بس تم تصوير المكان نفسه.
تعديل : تم الاستجابة من قبل الاستاذ محمد شعبان مدير عام الإدارة العامه برعايه المسنين و الاستاذ حسين اسماعيل مدير عام الإدارة العامه للدفاع الإجتماعى والتحقيق في الامر وتم معاقبة المقصرين في الدار .
وبحسب الجريدة ذاتها، صرح مصدر مطلع بـ وزارة التضامن الاجتماعي، بأن الوزارة تبحث واقعة دار أم كلثوم للمسنين في حلوان، وذلك بعد رصد انتهاكات وتعدٍّ بالضرب على النزلاء، من قبل أعضاء جروب شباب المعادي بعد زيارتهم لـ دار أم كلثوم للمسنين في حلوان يوم الأحد.
وقال المصدر بـ وزارة التضامن الاجتماعي، في تصريحات خاصة إن لجنة من الوزارة توجهت صباح اليوم إلى مقر دار أم كلثوم للمسنين في حلوان، للتحقق من واقعة دار أم كلثوم للمسنين، ويجري الفحص والعمل على حل المشكلة إن وجدت، في استجابة سريعة من الوزارة عقب نشر الواقعة.
