كتب - محرر الاقباط متحدون
أسعدت تصريحات الفنان احمد داش عن الإخواني "ابو تريكة" لاعب منتخب مصر والاهلي السابق, السلفيين والإخوان، فيما أثارت غضب عدد كبير من المثقفين الذين رأوا فيها مغازلة للمزاج السلفي وانها بعيدة عن المنطق .
وقال داش في تصريحات متلفزة :" أبو تريكة مشكلته في آرائه الشخصية هو ومحبته للنادي للأهلي.
وتابع:" انا بشوف ان ابو تريكة أحسن لاعب في تاريخ مصر وكان ممكن يطلع من الأهلي على مان يونايتد .
ورأى :" وبالنسبة لي كان هيبقى في مستوى زين الدين زيدان لو كان لعب في أوروبا، شفته لما لعب ضد البرازيل ايه ده .
كما اضاف :" لما تشوفه تؤمن بان الإسلام دين الله الصحيح والله العظيم؛ عشان مبيخافش يلاعب كريستيانو ياباشا مش بيهمه اللي هو انا مؤمن و ايمان ربنا في قلبي فهلاعب الشيطان .
وتابع :" لاعب مش طبيعي صاحب انجازات، عامل زي زين الدين زيدان لاعب لن يتكرر، وهو افضل من محمد صلاح .
واستنكر الكاتب الليبرالي هادي المهدي هذه التصريحات وكتب عبر فيسبوك :" على كده ميسي اكثر الناس إيمانا.. هو اكتر واحد لعب ضد كرستيانو.. اسكت
وعلق رامي حسن :" ماهي البلد كلها مضروبه بنفس النوع من الافيون. طول النهار برامج دينيه وخطب جوامع ومواعظ شيوخ وحتي الاعلاميين اشتغلوا شيوخ وبيروجوا للمؤامره علي الاسلام من كل سكان الكون فالمجتمع اصبح عنده حاله من الهوس الديني عايش فيه .
كما علق حساب باسم احمد فرحات :" عرف يدخل للجمهور الاحمر ازاي ، تلميذ محمد رمضان بصحيح.
ابو تريكة لاعيب طبعا ولاعيب جامد ولكن في احسن منه كتير ف مصر ، كمان لو راح اوروبا كان اخره الدكة عشان دا رتم وستايل لعب مختلف تماما عننا وعلشان كدا ما جلوش عروض ولا راح.
ومن بين التعليقات الغاضبة :
شعب مغيب وسازج دينيا .. مفيش فايدة
وعلق حساب ساخرا :" انا لما بشوف ميسي باؤمن بأن الأرجنتينيه هي الحل للانسانيه كلها لان ميسي مابيخفش من اللعب قدام قفشه وشيكابالا والشيطان نفسه لانه حريف.
ياجماعة الخير ، إنتم حاتجننوني؟؟!!! محترم إيه ؟! وكلامه "صح الصح " إزاي ؟؟!! ومن أي زاوية بالضبط؟!!!! ده ياريته ماتكلم !!!! في حد في الدنيا يؤمن بأن اﻹسلام دين الله الصحيح علشان شاف أبو تريكة ؟؟!!! يعني لو ماكنتش (ياولد) شفت أبو تريكة كنت حاتشكك في دينك ، أو في اﻹسلام ؟؟!! لاحول ولاقوة إلا بالله العلي العظيم ،، ثم إيش دخل ميسي ورينالدو في إختبار قوة إيمان أبو تريكة ؟؟!!! هو لما يلعب قدامهم بلا رهبة أو خوف يبقي ده دليل علي قوة إيمانه ؟!!! ليه هو بيلعب قدام (أبو لهب ) ولا (أبو جهل)؟؟!! ، الناس كانت تتكلم في أدائك التمثيلي وتشيد بك ...وإنت لما حبيت تتكلم ، فضحت نفسك ، وأثبت انك لا تجيد التحدث وضرب اﻷمثال .
ما فرق النصاري في كل انحاء العالم تهزم فرق المسلمين و اللاعبين النصاري اكثر مهارة و موهبه في اللعبه و ايضاً اكثر حصولاً علي البطولات الدوليه ، اذاً بمنطق هذا الشخص تكون النصرانيه هي دين الحق و دين الله !!!!.
مالقتش الا الارها بي التكفيري الاخوا ني المحرض السم ج دا !؟ فتيكة.
انت لحقت إدروشت ولا ناوي تنضم للجماعات الإرهابيه ياحماده...!!.
وبعدين تريكة ،والإيمان عمل ايه في البلد ؟! بقينا سنغافورة والا اليابان مثلاً !؟ ماحنا اهو لبسنا الحجاب وبنتسول ،وكله انتهي والهويه والحضاره انسرقت وفي طريقنا لطالبان، والدول العلمانيه حوالينا بقوا سويسرا واغني وارقي وأجمل.
كما علق ساخرا ارنست وليم :" قال ذلك بايمان وتأثر حتى ابتلت لحيته ، يعني على اعتبار ما سيكون.
طيب ملعبش ليه ..صلاح احسن منه على الاقل صلاح وطنى مش ارهابى .
يعني محمد زيدان .. وحسام ميدو .. ومحمد صلاح .. وأحمد حسن .. وحجازي .. والننيوغيرهم من اولادنا الدوليين الا حققوا ارقام عالميه في مسابقات عالميه وعملوا انجازات تاريخيه كل دول ولا اي حاجه دا انت جاحد يا جدع.
لم يكن يصلح لعب ابو تريكه فى اوروبا لان لياقته البدنيه متدنيه ولا يدافع ..يعنى تريكه اتركه فى مكانه.
خليك في التمثيل احسن وبطل تخاريف .
شوف يابنى انا غالبا قدك ف السن 3 مرات و باشتغل و اهلك لسهما أتولدوش و عمرى ما فكرت أناقش حد ف رأيه ف حاجة زى دى ولكن ماقدرش اعديها لأنى اعرف ناس من عيلتك مخهم نظيف و اذكياء مش زيك كده .. قصره ماهو يا إما انت عايز تعمل ترند و تركب الموجه و فى الحالة دى تبقى أخترت غلط يا اما انت فعلا مقتنع برأيك إن أبوتريكه احسن من صلاح و فى الحالة تبقى فاقد للعقل و المنطق و بديهيات المقارنة و الاختيار و تبقى كارثة.
مع حبى الشديد للكابتن ابو تريكة وانا لا انكر انه من افضل اللاعبين المصريين علاوة على اخلاقه وتربيته العالية انما حبي لبلدى مصر ولجيش مصر امتن واقوى من حبي لاي شخص اخر مهما كان صلة القرابة انا راجل غيور جدا جدا على بلدى مصر لدرجة انى لما بستمع للاغانى الوطنية اللى بتتكلم عن مصر وجيش مصر وابناء مصر اقسم بالله دموعى بتنزل وانا قاعد فى وسط ولادى او فى اى مكان وانا مبقولش هذا الكلام مجاملة لاي شخص كان .فذلك هى الحقيقة انها بلدى ووطنى انام واصحى واموت فدا ترابها.
