محرر الأقباط متحدون
كفاية ديون ، خنقتونا احنا و اللي خلفونا و اللي خلفناهم و اللي هايخلفوهم!
في تعليقه على الحساب الختامي لموازنة الحكومة ٢٠٢١/٢٠٢٢ ؛ قال النائب/ فريدي البياضي عضو مجلس النواب و نائب رئيس الحزب المصري الديمقراطي الاجتماعي:
في كلمات مختصرة، أوجه كلامي للحكومة و انا أرفض التقرير و أقول باختصار : كفاية!
-كفاية ديون!
غرقتونا و خنقتونا احنا و اللي خلفونا و اللي خلفناهم و اللي هابخلفوهم! الوزير بيقول أرقام و نسب و بيحاول يثبت ان نسبة الدين في تحسن . يا إما ارقامك وهمية يا وزير! وانا متأكد من كدا لان ال٨٧٪ دول مش حاطط فيهم ٢٤٪ ديون الهيئات الاقتصادية و حاسب سعر الدولار على ١٨! يا اما لو انت صح يبقى احنا اللي وهميين! و المواظن اللي ببعاني كل يوم و بيصرخ دا مواطن مش حقيقي! . احنا بنتكلم على إجمالي ديون تعدت ال ١٠ تريليون و تجاوزت اجمالي الناتج المحلي و فوائد ديون بتاكل نصف المصروفات!
-كفاية انتهاك للدستور ، حرام عليكم انتم أقسمتم على احترامه ! النسب اللي حددها الدستور للتعليم و الصحة في ٢٠١٤ و اللي مفروض تزيد كل سنة ، الحكومة ما بتصرفش ربع النسب دي! الوطن لن ينصلح حاله الا لما تعرفوا أهمية و أولوية التعليم و الصحة. و تعرفوا ان الحل في الاستثمار في البشر مش في الحجر!
و ختم النائب كلمته قائلاً : كفاية على الحكومة، احنا قدام حكومة لا تحكم، و لا تستطيع أن تحكم ! حكومة حققت العدالة الاجتماعية بأن أفقرت كل طبقات الشعب، بلا استثناء، و أضاف النائب من ٣ سنين تحت قبة المجلس طالبت وحدي بإقالة الحكومة، و اليوم مع كثير من النواب و مع جموع الشعب نصرخ.. كفاية كفاية كفاية!
