كشفت التحقيقات تفاصيل جديدة في قضية مقتل مسن على يد زوجته بمعاونة صديقها في روض الفرج، حيث أقرت بوجود اتفاق فيما بينها والمتهمين على تقديم مشروبات تحوي عقاقير مضادة للاكتئاب ومهدئة ومنومة للمجني عليه وحبات الفياجرا، ومساعدته على احتسائها، والمعدة والمجهزة من قبل المتهمين الثاني والثالث.
وحصل القاهرة 24 على التحقيقات في القضية التي حملت رقم 3869 لسنة 2022، وننشر أقوال المتهمة بقتل زوجها في التحقيقات كالتالي:
س: هل من ثمة اتفاق جنائي مسبق على ارتكاب ماهيات الواقعة محل التحقيقات؟
ج: أيوه.
س: ومن هم أطراف ذلك الاتفاق الجنائي؟
ج: هما أحمد.ك، وعلي.
س: ما هو مضمون ذلك الاتفاق الجنائي؟
ج: اللي أنا عرفته وحضرته إن هما كانوا متفقين إنهم يطحنوا برشام منوم ومهدئات في المشاريب وحبات فياجرا - ويشربهاله عن طريقي.
س: هل تمكن سالفا الذكر من بلوغ مقصدهما وفقا لما اتفقا عليه؟
ج: أيوه.
س: ما هي كيفية تمكنهما من تنفيذ ذلك الاتفاق الجنائي؟
ج: لقيت علي بيقولي أنا جايب عصير للحج سيد وحاطط فيه منوم، وانتي لازم تشربيه العصير، علشان أنا متفق مع أحمد ومالكيش دعوة إنتي بأي حاجة، فأنا بصيت وقتها لأحمد على أساس إن إزاي أعمل كده مع جوزي سيد، لقيته بيقوله اسمعي كلام علي لاحسن أفضحك عند خيلانك وأقولهم إن فيه راجل كبير فتحك واتجوزك عرفي، فسمعت كلامه هو وعلي وشربت جوزي سيد العصير اللي فيه المنوم، ولقيت علي بيصورني فيديو وسيد في حضنى وأنا بشربه العصير، وكان علي بيقول في الفيديو إن سيد اتجوزني رسمي وإن أنا مراته، وبعد الفيديو قالي أنا عملت كده علشان أحفظلك حقك، ومرة تانية يوم وفاة سيد، علي دخل المطبخ وعمل حلبة بعسل وأنا شربتهاله، وعلي نزل بعدها على طول وقالي أصلي رايح أجيب حاجات من الورشة، وبعدها بحوالي ساعة لقيت جوزي سيد مهبط لحد ما أغمى عليه ومات.
س: من تحديدا القائم على تحضير المشروبات التي تحوي عقاقير مهدئة ومنومة للمجني عليه؟
ج: أنا محطتش أي منوم أو مهدئ أو أي حاجة في أي مشاريب، اللي كان بيحط المنوم والمهدئ علي بالاتفاق مع أحمد.ك.
زوجته اتفقت مع صديقه.. ننشر أمر إحالة المتهمين بقتل مسن روض الفرج للجنايات
29 أبريل.. أولى محاكمات المتهمين بقتل موظف روض الفرج
س: أين تحديدا كان يتم تحضير تلك المشروبات؟
ج: أنا كنت ببقى قاعدة في الأوضة مع جوزي سيد، وعلي وأحمد.ك، كانوا بيبقوا مع بعض وبيجيبوا المشاريب من المطبخ بعد ما يعملوا اللي هما متفقين عليه.
س: من تحديدا القائم على تقديم المشروبات سالفة الذكر للمجني عليه؟
ج: أنا بس كنت مكرهه.
س: من تحديدا القائمين على إكراهك؟
ج: هما أحمد.ك، وعلي.أ.
س: ما هي وسائل الإكراه التي استخدموها ضدك؟
ج: الاتنين كان بيهددوني إنهم هيشوهوا وشي بمية نار ويفضحوني عند أهلي ويقولولهم إن فيه راجل كبير فض غشاء عذريتي واتجوزني عرفي، وأنا خيلاني ناس صعايدة ولو عرفوا حاجة زي كدة كانوا هيموتوني.
