ماجدة سيدهم
*  طيب  هاكررىها لعاشر وألف مرة مرة  ..أيوه ماعندناش تنوير في مصر ..اللي عندنا حالة اعتراض من دعاة الثقافة بشكل شخصي على بعض (مش كل )  ماجاء في التراث السلفي العدائي غير الإنساني بالمرة ..   

* وتعقيبا على مقالي السابق  واللي قبله "هل نجحت حركة التنوير في مصر ؟ " وغضب منه بعض التنويرين ..

وقولت لأ ..لأن التنوير اللي يقتصر فقط على جدال متواتر للفكر الديني السلفي هو تنوير غير واعي وغير ناضج ومرتعش ..بل التنوير اللي ما يجرؤ يناقش بحرية  قضايا فلسفية  ووجودية أو يطرح للنقاش أي فكر جديد ويدعم الابداعات المجازفة ولو في عمل درامي ويبقى عنده الشجاعة  والقوة يبني ثقة بينه وبين الشارع ليخرج بالشعب من ظلمة التخلف والجهل  والانسحاق إلى  النور والفهم والإدراك  هو بلا شك خدعة تسمي بالتنوير اللي للاسف بيقتصر على مجموعة من الأصدقاء لهم نفس المشاركات والاهتمامات.. بيسمعوا  لبعض ويصقفوا لبعض ويتقابلوا  مع بعض و موافقين على آراء  واعتراضات  بعض بنفس لغة الاستعلاء والتهكم من جهل وتغييب وتخلف الشارع الحزين..

 طيب  سؤال هو التنوير دا مين المقصود بيه ..؟! يعني مين الشريحة  المستهدفة  ؟!
*,طب بذمتكوا  دا حال بلد فيها مثقفين ومفكرين وفلاسفة  ومبدعين وخلاقيبن أحرار !   
ولما حال الشارع  يزداد سوء ويتشبث أكتر بأوحال السلفيه الميتة باعتبارها الدين ..يبقا إحنا عندنا تنوير ..؟!

*وبعد مادخل بعض التنويرين  في أحد تعليقاتي  (من وقت )  ليخبروني بأنهم فقط اللي فاهمين التراث وافهمين لغة بعض وعارفين إزاي يلاعبوا مشايخ السلفية..فبلاش إحنا ندخل بتعليقاتنا   باعتبار مافيش تنويري مسيحي ..يعني دا تراثنا ومشايخنا واحنا حرين  مع بعض
أولا.. كلامكم صح وفعلا مافيش تنويري مسيحي لأن المسيحي ماعندوش أزمة يعاني منها في كتابه أو تراثه تنكد عليه وعلى عيشته وتنكد على اللي حواليه وعلى بلده ..

 وصحيح أنتو فاهمين التراث السلفي أكتر مننا بحكم المرجعية  الدينية( رغم  أن الميديا النهاردة وضحت كل شيء )..بس أحنا   اللي بندفع تمن التراث ..أحنا أول المتضررين و المستهدفين من فكر السلفية المحرض على تفعيل الكراهية والعنف وأعمال التخريب والتغرير والذبح علنا لمجرد اختلاف المرجعية الدينية  ..

أظن كدا يا يكون رفضنا للفكر المخرب هو من منطلق تضرر حقيقي وشديد ومقصود مش مجرد شو   ..

وأظن كدا وبنظرة متواضعة  للشارع البائس تقدروا تجاوبوا  على سؤال مهم ..هل نجح مايطلق عليه تنوير في مصر؟
اعلموا جيدا يوم مايحصل تغيير جذري حقيقي لخلاص وحرية هذا الشعب  هايكون تلقائيا من القاع المفروم والمنداس عليه من ضغط السلفية التعيسة ومن سخرية وتعالي دعاة التنوير والثقافة  ..