كتب - محرر الاقباط متحدون
وافق البرلمان المصري على فرض حزمة ضرائب ورسوم جديدة على المواطنين، وعلق الدكتور محمد معيط وزير المالية على الرسوم الجديدة بالموازنة التي أقرها مجلس النواب.
وقال معيط في تصريحات خاصة لبرنامج (الحكاية) تقديم الإعلامي عمرو اديب على فضائية mbc مصر :" يتم تنظيم حفلات في الساحل الشمالي تذكرة الدخول بآلاف الجنيهات والناس مش زعلانة، لكن لما الدولة تاخد منهم 5 جنيه الناس تزعل .
وتابع :" هو أنا جيت جنب ايه حفلات الديسكو وحفلات اللي مش عارف ايه وبتاع اللي انا مباخدش عليها جنيه، عاوز تقولي ان واحد راح دفع في حفلة 3 آلاف جنيه لو قلت له اديني 20 جنيه دا بقى اللي هيزعل .
واستنكر مصريون فرض ضرائب ورسوم جديدة،واصفين تصريحات معيط بغير المدروسة، حيث تقتصر حفلات الساحل على الاغنياء.
ومن بين التعليقات الغاضبة :
مش كل الناس زي حضرتك بتروح الساحل ارحمونا.
-سياده الوزير المحترم حضرتك دي فئه في المجتمع 3الف عندهم زي 3جنيه عند المواطن البسيط المطوحون فلو حضرتك فرضت ضريبه يبقي علي الحفلات الي زي دي السيارات المودلات العاليه الي بتعدي 10مليون علي المساكن الثريه مثل الفيلل والقصور بمعني اوضح بينات كل مواطن اكيد عن مؤساسات الدوله تقدر تتحكم فيها وبفرض ضرائب اكثر علي الي يقدر ونديها لليستحق اكثر من 25% معاه يدفع زي نجوم الفن والرياضه والاقتصاد و75% من الشعب شغال عند الناس دي الله غالب ربنا يعين كل مسؤل بيتق الله في عمله.
وكتب حساب ساخرا مقتبسا من فيلم كوميدي شهير :" ابسطهالك .. لو واحد معاه طبق كشرى وأخذت منه معلقة هيموت من الجوع.
-مش كل الناس في الساحل ياسيادة الوزير المشكله انكم شايفين الشعب كله في الساحل لما سحلتونا.
-عشان المشكله انك فاكر ان الشعب كله بيروح الساحل ياعم ارحمنا 70 فى الميه من الشعب كبيرة انه يتمشى على كورنيش النيل ده فى القاهرة وكورنيس البحر اسكندريه وباقى المحافظات والمراكز والقرى مافيش غير الترع ياباشا.
-مهما الناس اللي بتزعل علي ال٥ مش هي اللي بتصرف الافات روح خد من اللي بيجيبوا تذاكر وسيب الغلابه ال٥جنيه تجبلهم طعميه.
-نسبه كام من الدوله بيروحوا حفلات خذ من الي ساكنين في قصور والي راكب عربيه فارهه والي رصيده ملايين ذو فواتير النوادي الغاليه المقصود الي مش حيفرق معاه الفلوس زود عليه ميبقاش علي عامه الشعب الغلبان الي مبيروحش يتفسح من الاساس عشان مش لاقي.
-ياباشا دول غير دول هما بتوع الملاكي اما احنا بتوع الاتوبيس.
-ما هو مش كل الناس بتروح الساحل يا بيه ..وبعدين هو مفيش تفكير غير انكم تاخدوا فلوس من المواطن بأى شكل .الرحمه حلوه.
-خد من الناس اللي بتروح حفلات الساحل وعلي ما اظن أنتم ععارفينهم كويس لكن الناس اللي مش قادرة تكفي نفسها عيش حاف تاخدمنها لية.
-الي بيدفع في الحفله مش هو المواطن الغلبان الي بتقهروه يدفع الخمسه جنيه انت بتقهر الفئات المعدومه مش بتوع الحفلات بدل ما تفرض ع الغلبان الخمسه جنيه دي افرض ضريبه خمسميت جنيه علي تذكره الحفله وبرضه محدش حيزعل.
-بس مش كل الشعب بيروح حفلات الساحل.
-دي بالضبط نظرية طبق الكشري بتاعة فيلم غبي منه فيه.
-اقول لك لية عشان الناس بتدفع الفلوس دي عشان تتبسط ان شالله تدفع ملايين دي فلوسها و هي حرة فيها انت تاخد ان شالله جنية مش من حقك و مقابل اية بعني و كمان زعلان ان الناس زعلانة هو بجد انتوا مافيش اي تفكير غير انكوا تقاسموا الناس في فلوسها عارفين فتوة الحارة بتاع زمان اللي كان بيقاسم الناس في شغلها من غير اي مجهود.
-ياراجل يامحترم يعني اللي بيروح الحافلات الشعب كله ولا فئة معينة يارجل اتقي الله هتسئل على كل حاجة عملتها في الدنيا كفاية حزن انتو حكومة فاشلة مش عارف تيجبب دخل تخش على المواطن وتمص دمه كفاية الناس كلها ولعت.
لما بتيجو تاخدو العشرين جنيه بتاخدوها من الغلبان مش من اللي في الساحل والغلبان اللي بيدفع الثمن ابقو روحو الساحل واقفو على باب كل حفله ولمو عشرينات كتير براحتكم والله حال ناس كتير هيتعدل بالفلوس دي.
-مشكلتكم انكم فاكريين أن الشعب كله فى الساحل وللأسف بتتعاملوا مع كل الفئات بالمبدأ ده ارحمونا بقى
-ماهو حضرتك مش كل شعب مصر بيروح حفلات.
-كلم الفئة بتاعة الشليهات والكمبوندات ورجال الاعمال الناس شرائح ومش كلهم ف كفة واحدة احنا مالنا بالناس دى أغلبية الناس مش ليقة تجيب تمن احتياجاتها الأساسية هتروح حفلات.
-مش كل الشعب في الساحل الشمالي يا محترم.
يا سيادة الوزير المحترم اولا مش كل الشعب ف الساحل و ال ٣٠٠٠ اللي حضرتك بتقول عليها فيه موظفين و عمال بالملايين مبتتحصلش عليها و مينفعش سيادتك تقول كلام زي ده عيب ف حقك.
