كتبت:رضوى النبراوي
ألووو أيوة يا بابا هاتلي كيس شيبسي بالخل و انت جاي
رقائق البطاطس أو الشيبسي من أشهر و أفضل الوجبات الخفيفة و المحببة للكبير قبل الصغير
اختراع الشيبسي سببه خناقة عويصه و كبيره بس الخناقة دة كانت بفايده للعالم كله 😂😂 في يوم من سنة ١٨٥٣ م في مطعم فندق ( ساراتوجا سبرينجز نيويورك) واحد بيتغدى و ماعجبتهوش البطاطس و بقى يتخ*انق و صوته عالي و يشت*م في الطباخ لانه عامل البطاطس تخينة و شاربة زيت و مافيهاش ملح 🥴
الشيف ( جورج كروم) جاب آخره من الراجل دة و حلف ميت يمين يخليه مايدخلش المطعم عنده تاني فقطع البطاطس رفيعه جدا جدا و قلاها في الزيت و رشها بملح كتير و قدمهالوا بس النتيجة جت عكس توقعات جورج 😂 و الراجل عجبته البطاطس و اتكلم عليها و عزم اصحابه عليها و من هنا اشتهر جورج كروم برقائق البطاطس و اسمها (ساراتوجا تشيبس) لحد سنة ١٩٢٦ ابتكرت لورا سكادرز عبوات ورقه يتحط فيها الشيبسي و يتباع في الشوارع في أكياس محكة الغلق و من هنا بقى اتاسست شركة (Lays) لعقود طويلة جدا في لندن
الشيبسي في مصر كانت اكله بيتي لحد في يوم اتنين من ضباط حرب أكتوبر المصابين راحوا يتعالجوا في لندن ( عبدالعزيز علي & محسن محجوب) لفت نظرهم أكياس شيبسي تتباع في الشوارع بكمية كبيرة و عليها إقبال فكروا انهم يدخلوا الصناعة دة لمصر بدأوا يسالوا و يستفسروا عنها
و لما رجعوا المحروسة بالسلامة حاولوا يجمعوا شركاء لفكرتهم و فعلا قدروا يجمعوا زملاء ليهم و منهم زميل كان في الخليج و هو اللي ساهم في تمويل المشروع
بعتوا يشتروا معدات البطاطس من إنجلترا و سافروا يتعلموا كيفيه التعامل مع المعدات مش بس كدا و جابوا خبراء انجليز عشان العمال تتعلم منهم
و أنتج أول كيس شيبسي مصري في التمانينات و كان ب١٠ قروش و طبعا اتشهر و بقى عليه إقبال يفوق الخيال و مصنع الشيبسي بقى مملوك حاليا لشركة بيبسيكو 😋
بس طبعا مفيش أجمل و أروع من شيبسي ست البيت 🤗😋😋
و لنا لقاء ان شاء الله الاسبوع القادم مع شخصية جديدة من شخصيات نستها السطور 👌👌👏
رضوى النبراوي
