مواطن يحذر من خدع فنيين اصلاح اطارات السيارات : بيخرموا الكاوتش السليم علشان يقلبونا في فلوس

تداول رواد مواقع التواصل الاجتماعي، منشور لحساب باسم "احمد رضوان" يتضمن تحذير من خدع اصحاب مراكز تصليح اطارات السيارات، وجاء بنصه : 

 تنبيه هام لأى حد معاه عربية من أى نوع ، سواء كان معاك عربية او بتشتغل على عربية او بتسوق عربية لأى سبب كان وبتمشى بيها على الطريق تحديدا عند اللجوء لأى حد بتاع كاوتش سواء كنت عاوز تزود هواء او نيتروجين او تكشف على كاوتش شاكك فيه

*فيه اسلوب قذر جدا بيتبع الايام دى من خلال الصنايعى او الفنى بتاع الكاوتش / ايه هو الأسلوب ده وإيه الحكاية ؟؟؟.

 

اشرحلكم أنا تجربتى الشخصية مع خدمة كاوتش محطة ( شل أوت الجلالة ChillOut Galalah  ) على طريق الجلالة تحديدا يوم الأحد 2023.06.11.

 

كنت عاوز اشيك على ضغط الكاوتش فقط لا غير دخلت المركز التابع للمحطة المذكورة

انا : عندك نيتروجين

فنى الكاوتش : اه عندى

انا : طب زود الكاوتشات

فنى الكاوتش : الاربع فرد ؟

انا : اه كلهم انا مسافر وعاوز اشيك عليهم

فنى الكاوتش : تمام خلاص خلصت ... بس الفردة اللى قدام دى كانت ناقصة عشرة !!! ( هنا بداية اللعبة )

انا : اه اصلها جديدة ومزودتهاش من يوم ما ركبتها عادى متشغلش بالك

انا : حسابك كام ؟

فنى الكاوتش : اللى تجيبه

انا : اديته اللى فيه النصيب ... لسه هركب العربية وماشى

فنى الكاوتش : استنى ... اكسر كدة عجلك يمين اشيكلك على الفردة اللى كانت ناقصة ( اللعبة مستمرة )

فنى الكاوتش : جاب زجاجة فيها مياه بصابون تقريبا ورش على الكاوتش ...( اووووبا ) فيه مسمار يا استاذ !!!!

انا : مزهول طبعا ... الفردة جديدة لسة راكبة .... ومفيش مسمار ... فيه خرم فعلا لكن فين الحاجة اللى خرمت الكاوتش !!! ... لا فيه مسمار ولا شوكة ولا اى حاجة خالص

فنى الكاوتش : ارجع عجلة ورا اصلحهالك ( اللعبة مستمرة )

انا : ماشى ورجعت فعلا ( مسافر ومستعجل ومش مستحملة امشى كده )

وبعد ما رجعت ....

فجأة يدخل عليا واحد بعربيته معرفش جالى منين ( انا لحد النهاردة بقول ده ملاك ربنا بعتهولى ) ويقرب عليا جامد بطريقة انا استغربتها بقول لنفسى ماله ده فيه ايه هية ناقصاه هو كمان

الشخص : بقولك ايه هو بتاع الكاوتش قالك فيها كام خرم

انا : بيقولى فيها خرم واحد

الشخص : انت عرفت منين انها مخرومة ... انت جاى بيها مخرومة وعارف ولا ايه اللى حصل

انا : لا ده انا جاى ازود نيتروجين وبتاع الكاوتش قالى العجلة اللى قدام ناقصة عشرة ... كشف عليها لقى فيها خرم ... وانا شوفت الخرم فعلا

الشخص : سكت شوية راح ماشى بالعربية بس براحة

انا : اديته كلاكسات جامد لحد ما وقف ... نزلت من العربية ورحتله قدام شوية بعيد عن بتاع الكاوتش بكام متر

انا : سألته هو فيه ايه فهمنى الحوار ؟

الشخص : ( زى ما يكون نفسة يتكلم ويفضفض ) سألنى تانى الكاوتش مخروم بين النقشة صح ؟ ( مرفق صورة لتوضيح المكان بين النقشة )

انا : فى زهول تام ... ايوة فعلا بين النقشة ... وكمان لاحظت حاجة غريبة ... فيه خرم لكن مفيش مسمار ولا اى حاجة المفروض انها تكون خرمت الكاوتش

الشخص : انا جيتلهم هنا قبلك وبكشف على الكاوتش بوظهولى وطلعو فيه 3 اخرام وخدو منى 500 والفردة باظت بعد كده خالص

انا : طب ايه حكاية الخرم دى مش فاهمها

الشخص : ده اسلوب قذر بيستخدموه ... بيكون معاهم حاجة زى ابرة او شوكة ماسكها باحترافية مستحيل تاخود بالك منها لانك مش مدى خوانة اصلا ... اول ما يقرب من الكاوتش يشكه فى اضعف منطقة  ( بين النقشة ) وبعد كده يقولك اى حوار عشان يشيك على الكاوتش وطبعا هو متأكد ان فيه خرم ... وانت تفكيرك هيتشل لانك مش متوقع ومش هتفكر فى اى حاجة غير انك تصلح المشكلة وخصوصا انك على سفر

انا : طب تنصحنى بإيه دلوقتى ؟ ... انا معنديش دليل قاطع ان الكاوتش مخروم بفعل فاعل او مخروم من الاول ... تنصحنى بإيه ؟

الشخص : بص مش انت زودتها ؟

انا : ايوه زودتها

الشخص : خلاص امشى بيها متعملش عندهم حاجة فى طريقك هتلاقى بتاع كاوتش محترم فى ( غارب ) صلحها وأسئلة دى مخرومة بفعل فاعل ولا خرم عادى من الاول

انا : خلاص ماشى وسلمت على الراجل وشكرته ... رجعت العربية ... ولسة فنى الكاوتش مستنى عشان يصلح الكاوتش ( عاوز يكمل اللعبة )

فنى الكاوتش : ايه يا أستاذ

انا : لا خلاص مش هعمل حاجة ... همشى ... ومشيت فى هدوء وصمت ... مشيت لحد ما وصلت لبتاع كاوتش (غارب) ... لو سمحت الكاوتش اللى قدام ده فيه خرم عاوز اصلحه ( ما انا خلاص متأكد ان فيه خرم )

كاوتش غارب : حاضر اخلص اللى قدامك وخش على طول