كتب - محرر الاقباط متحدون
وجهت د.امل حرب الاستاذة بجامعة الاسكندرية، رسالة عبر حسابها الرسمي على فيسبوك، بعنوان "خمسة تفكير" وجاء بنصها :
إصنع جنتك بنفسك وانت عايش ، ايه ضمانك ان فى جنة فى الآخرة ؟ هتقولى ربنا وعدنا فى الكتاب ! جميل جدا ، ماهو ربنا برضوا قالك ادعوني استجب لكم ، وقال فإذا مرضت فهو يشفين ، وقالك كمان لما تتظلم قول حسبى الله ونعم الوكيل ، هل استجب لأحد من فقير أو مريض او مظلوم !؟ بدون فعل وجهد منه !؟ لو جاوبت بنعم ، يبقا انتظر الجنة وخليك تعبان وفقير ومظلوم فى الدنيا .
رغم إن التجارب كلها اثبتت ان الامور لا تعالج بالدعاء ، المريض يعالج بالعلم ، يروح لدكتور وياخد العلاج المظبوط ، والفقير علاجه العمل ، امال ايه بقا من زرع حصد ، عمرك شوفت حد حصد ثمار اى شئ بالدعاء وبدون زرع ؟ والمظلوم ياخد حقه بالعدل ، محدش بيتظلم ويكتفى بحسبى الله ونعم الوكيل ، طبعا لا ، لابد من توكيل لمحامي يدافع عنه ومحاكم وقضايا وادلة وأوراق ....الخ .
وكلامى لكل إنسان مؤمن ومعتنق لاى ديانة . لان الوعد بالجنة والملكوت موجود فى كل الاديان ، طبعا هجد من يختلف معى ، على أنى مش مؤمنة بكتاب الله و و ....الخ السيناريو المتكرر لأى شخص يحاول يفكر خارج الصندوق المظلم ، والخروج من عنق الزجاجة ، والنتيجة أصبحنا فى ذيل الأمم ، مجتمع عايش يحلم بجنة لم يصنعها ، ويدعى على اخرين صنعوا جنتهم بأيديهم وفكرهم وعلمهم ليس بالدعاء ، وانت لسة قاعد فى فقر وظلم وقهر ومرض ، ونفسك تعيش فى جنة الكفار !!! .
رأيى دة من واقع كلنا مسلمين واقباط وجميع الاديان عيشاه ، كلام الكتب السماوية اللى كلنا مؤمنين بيها حاجة والواقع حاجة تانية خالص ، انا بقول نعيش الواقع والتجارب اثبتت دة ، والدين فى قلوبنا ، نصلى ونصوم ونحج ...الخ الشعائر الروحانية لا بنفيها ولا بنتقدها .
كلامى اننا نحل مشاكلنا بالعلم والعمل وإقامة العدل ورفع الظلم ، لا هى بتتحل بالدعاء ولا هتتحل .بقالنا ١٤٠٠ سنة بندعى على دولة بعينها ولم يستجب ! بل بيزيدوا تقدم ! هل ربنا بيعاندك مثلا ؟ لا طبعا ، هم بيتقدموا بالعلم والعمل ، وسيادتك قاعد تدعى عليهم وتدعى لنفسك بصلاح الحال ، عمره ماهيتصلح . هارجع للجنة تانى ونعيمها فى الدنيا.
إصنع جنتك بنفسك مش القصد جنة النعيم بحور العين وانهار العسل والخمر ، تؤ تؤ نوهااائى ، رغم تقدر ايضا تصنع جنة فيها حورية جميلة لك باخلاقك الجميلة ورجولتك مش موضوعنا ،
اقصد( جنة العلم ) المدرسة والجامعة جنة العلم ، المعرفة هى جنة العمل ، الفنون جنة الجمال ، الإنسانية بكل معانيها هى جنة الحياة على الأرض .
إصنع جنتك بنفسك .
د/ امل حرب
