مين المفروض يعمل تحليل السكر التراكمى؟؟؟
- أي شخص وزنه زايد.
- اى واحد في عيلته الوالد أو الوالدة أو أي واحد من أخواته جاله سكر.
- أي واحد عنده مشاكل في الأوعية الدموية أو الضغط أو القلب أو الكلى أو في شبكيه العين..
المفروض يعمل التحليل مره كل سنه ولو طلع ازيد من 5.7 يبتدئ يهتم جدا بالنسبة لتغذيته لأنه الأمل في منع حدوث السكر.
طب لو انت مريض سكر المفروض تعمل تحليل السكر التراكمى كام مره؟؟
المفضل يعمله مره كل ثلاثة شهور علشان نعرف مدى التزام المريض بالعلاج والتغذية..
بعض الناس بتطلبه كل شهر أو شهرين، الحقيقة ده ما لوش أي قيمه، لأنه زى ما قلنا ان كرات الدم الحمرا بتتغير مره كل 3 شهور، فلو عملته كل شهر فانت بتسجل نسبه السكر المخزنة خلال الثلاثة شهور الماضية فانت ما استفدتش حاجه.
لوفيه مريض عاوز تتابعه كل شهر أو كل شهرين ممكن تحليل السكر الصايم أو العشوائى أو بعد ساعتين من الأكل، هو فيه تحليل شبه تحليل السكر التراكمى وهو بيقيس السكر اللى لازق في الألبومين (الألبومين هو بروتين موجود في الجزء السائل من الدم اللى بنسميه البلازما ) وميزه هذا البروتين أن عمره الافتراضي من أسبوعين لثلاثة فنقدر نشوف مدى استجابة المريض للعلاج.. التحليل ده اسمه فركتوزامين أو Fructosamine – Glycated Albumin
التصاق السكر في خلايا الدم (الهيموجلوبين) من حظنا انها بتتغير كل 3 شهور, لكن خلايا أخرى زى خلايا الأوعية الدموية وخلايا الكلى وخلايا الشبكية لا تتغير كل 3 شهور فلما يحدث بها التصاق من السكر بها (تسكر) تعانى معاناه شديد وخلال سنين, الخلايا دى وظيفتها بتقل وتتأثر, فتبتدئ الكلى تتأثر وينزل زلال في البول ولو أهملناها تؤدى الى فشل كلوى, ونفس الحكاية لخلايا الشبكية لو سبناها تؤدى الى الاضرار بالبصر وممكن تؤدى الى فقدان البصر, وتسكر الأوعية الدموية يؤدى الى تصلب الشرايين ويؤدى الى ارتفاع في ضغط الدم ومشاكل في القلب في الكبار والشباب وممكن انسداد الشرايين الطرفية وحدوث غرغرينا في الأطراف وممكن تؤدى الى بتر في الأصابع او القدم...
السكر التراكمى بالرغم من مميزاته العديد، لكن ما بعرفش الوضع الحالي للمريض، بمعنى لو المريض حلل السكر التراكمى وطلع مقبول حاليا، فممكن يكون السكر الحالي في الدم عالي... نقول تانى تحليل السكر التراكمى لا يغنى عن التحاليل الأخرى للسكر ولكن يعطى لينا التاريخ المرضى لمريض السكر خلال الثلاثة شهور الماضية ويقولنا إذا كان ارتفاع السكر في الدم حاليا سببه عرضي نتيجة تغذيه خاطئة او زعل مفاجئ او قلق وعدم اخذ قسط من الراحة والنوم والا ده مريض سكر حقيقي..
وكلمه اخيره لو انت وزنك زايد او يوجد أحد من عائلتك عنده سكر أو عندك مشاكل في الضغط أو في القلب أو في الكلى أو مشاكل في شبكيه العين فانت محتاج لعمل تحليل السكر التراكمى Hb A1c" ويستحسن تعمل تحليل مقاومه الأنسولين اللى هو "HOMA-IR" للأطمئنان على نفسك وتعمله سنويا...
أتمنى لكم الصحة والعافية ... تحياتي.
د. أمير فهمى زخارى المنيا
