د. أمير فهمي زخارى المنيا
ما أهميه الدهون الثلاثية؟..
ده اللى ها اقولم عليه في المقال ده (بيتصنع فين في الجسم وبيزيد ليه وإزاى نقلل كميته في الجسم) ...
الدهون الثلاثية دى شكل من اشكال الدهون الموجودة في الدم ...
فيه شكلين مهمين للدهون في الدم وهما الدهون الثلاثية والكوليسترول...دول مختلفين في التركيب والوظيفة...الكوليسترول ماده بتخش في بناء الخلايا وبناء الهرمونات في الجسم، انما الدهون الثلاثية وظيفتها الرئيسية امداد الخلايا بالطاقة وهي ماده بتتحرق زى الجلكوز وتطلع طاقة.. لو احنا مش محتاجين حرق دلوقتى، نقدر نخزنها على شكل دهون، بمعنى كل خلايا جسمك الى تحت جلدك وكرشك عباره عن خلايا دهنيه مملوءة دهون ثلاثية...
= طب بتتكون إزاى الدهون الثلاثية وبتنقل ازى الى الخلايا الدهنية..
هي بتتكون في الكبد، وطبعا بتتنقل إزاى ...
احنا عارفين ان الدم بتاعنا ماده مائية والدهون لا تذوب في الماء , فلو حطينا الدهون الثلاثية والكوليسترول في الدم ها يتجمعوا ويعوموا على الوش ويعملولنا مشاكل ,فالكبد بيصنع حاجه كويسه بينقل فيها المواد الدهنية دى, زى محفظة أو كبسوله, وبنسميها ليبوبروتين "Lipoproten" , ويملاها بالدهون لنقلها وتسمى بعد ذلك " VLDL" ويتم نقلها من الكبد الى خلايا الجسم, فلو احتاجت طاقه يتم حرقها ولو انت مش محتاج طاقه فيتم تخزينها في خلايا الدهون في الجسم... فلو احتجتهم مره أخرى في حاله الرياضة أو الصوم فيخرجوا مره أخرى ليتم حرقهم لأمدادك بالطاقة.
الكبسولة VLDL" " بعد ما يتم تفريغها من حمولة الدهون الثلاثية فحجمها بيقل وبيكون جوها كوليسترول بس وبتسمي "LDL" اللى هو الكوليسترول السيئ ...
= معايا والا تهتوا منى..
طيب كنا زمان بنقول كل ما نأكل دهون اكتر الكبد بيكون كبسولات VLDL"" اكتر.. الكلام ده اتغير وأصبح الكبد بيصنعها في اغلب الأوقات من النشويات والسكريات اللى بناكلها،
احنا بناكل نشويات وسكريات كتيره والكبد له قدره صغيره لتخزينها في هيئه جلايكوجين "Glycogen" ... فلو اكلنا اكتر من طاقة الكبد لتخزينه، فيضطر الكبد لتحويل النشويات والسكريات الى دهون ثلاثية ويصنع الكبسولات ويملاها بيهم وينقلها الى الدم...
= امتى بقه الدهون الثلاثية ترتفع في الدم:
لو حضرتك اكلت كميات كتيره من السكريات والنشويات والدهون، طبعا الكبد ها يتعامل معها زى ما وضحنا والزائد ها يروح للخلايا الدهنية ويتخزن فيها... طب لو الخلايا الدهنية مليانه، يبقى الدهون ها تلف في الدم وتعمل مشاكل كثيره.
طب لو خلايا الدهون ملتهبة ولا تستطيع تخزين الدهون بها بالرغم من انها فاضيه، طب ايه سبب التهاب الخلايا الدهنية، انا أقولك:
- اكل الزيوت النباتية " الأكل المقلى" ودي فيها اوميجا 6 ودي ماده ملهبه.
- عدم أكل المواد الغنية بأوميجا 3 المضاد للالتهاب زى الأسماك ومضادات الأكسدة الموجودة في الخضروات والفواكه الطازجة...
= الخلاصة:
الدهون الثلاثية تستخدم في الحرق والتخزين مش في البناء.
الجسم بيصنعها يوميا لأنك بتأكل سكريات ونشويات كتير والكبد مش قادر يخزنها فببيعتها خارجه لتخزن في الخلايا الدهنية في الجسم، فلو كانت ممتلئة أو ملتهبة، فا هترتفع في الدم...ويرتفع معها الكوليسترول وتخش في دوامه تصلب الشرايين وارتفاع ضغط الدم وأمراض القلب الخ.
= طب لو انت عندك الدهون الثلاثية اكتر من 100 ها تعمل ايه؟
ها قولك:
- تقليل الدهون في الاكل وحده ده كان اعتقاد خاطئ لكن لازم تقلل بقدر الإمكان من اكل النشويات والسكريات وبلاش من الدهون المتحولة يعنى السمنة الصناعي.
- تزود اكل الخضروات والفواكه الطازجة لان فيها مضادات الأكسدة لأنها تساعد على الشفاء من التهاب الخلايا الدهنية.
- تزود اكل الأسماك والمأكولات التي تحتوي على اوميجا 3 التي توجد في المأكولات البحرية المختلفة من أسماك الماكريل، والتونة، والسلمون، والبوري، والأنشوجة، والسردين، وغيرها من الأسماك. ويمكن الحصول عليها عن طريق تناول بعض الكبسولات الجاهزة والمعروفة باسم زيت السمك. •
ويعتبر زيت الكتان والمسمى بالزيت الحار الذى يضاف للفول من أغنى المصادر " 53,3 % " ثم زيت السالمون " 19,9 % " ثم زيت كبد الحوت "18,2%" , ثم زيت الرنجة "12%" , ثم زيت اللوز "10,4%".
- نقلل من الزيوت المحتوية على اوميجا 6 لأنها بتزود التهاب الخلايا الدهنية زى زيت الذرة، زيت عباد الشمس، زيت بذرة القطن، ونقلل من المقليات.
- نقلل من الوزن بقدر الإمكان.
- واخير لازم تعمل رياضه ولو رياضه المشي ها يفرق كتير في العلاج....
- الأدوية: يلعب كلًا من النظام الغذائي والرياضة دورًا مهمًا في ضبط مستوى الدهون الثلاثية، لكن قد يكون من الضروري أن يأخذ المريض الأدوية أيضًا لخفض مستوياتها لو نسبه الدهون الثلاثية لم تنخفض.
أتمنى ليكم الصحة والعافية ... تحياتي.
د. أمير فهمي زخارى المنيا
