اندراوس عبدالمسيح
الكنيسة محتاجة لكل ابنائها بكل مواهبهم المختلفة , معروف ان الكنيسة عبارة عن جسد والجسد فيها اعضاء كثيرة مختلفة في الوظائف وفي الشكل
يعني القلب مختلف تماما عن العقل و العقل مختلف عن الكبد والكبد مختلف عن المعدة . ومع ذلك لا يمكن الاستغناء عن اى عضو من اعضاء الجسد رغم اختلاف الوظيفة واختلاف الشكل
احيانا كتير بيغيب عننا مفهوم الجسد دة ويبتدي كل عضو يهاجم مهام وشكل العضو الاخر و طبعا كل عضو يشعر ان دوره هو الأقوى هو الصح هو المفروض ان كل الاعضاء تبقى ذية وعلي شكلة ولكن تخيلوا معايا كدة لو كل الاعضاء تحولت الي قلب فقط او تحولت كل الاعضاء الي كبد فقط فالجسد هيموت
بنلاقي خادم مثلاً مهتم بالعقيدة او الدراسات اللاهوتية بيعتقد ان الخدمة دي او الاهتمام دة هو المفروض كل الاعضاء تبقى شبهه وشكلة ودا مش صح , وخادم اخر مهتم بالألحان او الطقس بيبقى فاكر ان اى عضو مش حافظ الحان او عارف طقس دا شخص مش روحاني او خادم اخر مهتم بالصلاه بيبقى عاوز الخدمة كلها عبارة عن قداس او عبارة عن صلاه ,
في الحقيقة الكنيسة محتاجة كل النوعيات دي , الروح القدس اصلا واهب لكل شخص موهبة معينة و عاوزة يخدم بشكل معين وبطريقة معينة
يعني في خادم بيحب الانشطة وخادم روحاني وخادم عقيدي وخادم طقسي المجموعة دي تعزف سمفونيه رائعة وتكتمل صورة الكنيسة بتنوع الاعضاء
اخدم بموهبتك بدون ان تقلل من خدمة الأخريين , اخدم بموهبتك بدون ما تشعر انها الأهم وهي الأساس , اخدم بموهبتك بدون ان تلغي مواهب الاخريين . ربنا عاوز الكل والكنيسة محتاجة للكل
الكنيسة محتاجة الكبير والشاب والصغير , محتاجة الخادم العصري بتاع الميديا و محتاجة الخادم التقليدي المحافظ , ومحتاجة الخادم الميداني والخادم قليل الحركة كلنا مع بعض بنكمل بعض والصورة تكمل
الروح القدس هو قائد الكنيسة وهو اكيد عارف بيعمل اية كويس , بلاش تبقى وصي علي الروح القدس وتعتقد ان موهبتك هى وبس , بلاش تقلل من اخوك ولا من خدمتة , جايز انت مش شايف ان ليها فايدة اصلا بس ربنا لية رأي تاني غير رأيك .
التنوع مطلوب للكنيسة والخدمة وبدون التنوع دة الجسد هيموت , حتى الرسل انفسهم كانوا متنوعين عشان كدة كانت خدمتهم جبارة
تعالى نشوف مشهد توما الرسول القديس العظيم دة
الشك بتاعة كمل المشهد بصورة رائعة اولاً شهد ان المسيح قام بجسد حقيقي وليس شبح لما لمس وتأكد و سجلت المعلومة دي , كمان شهد للمسيح وقالة ربي والهي و العبارة دي استشهدت بيها الكنيسة في براهين لاهوت المسيح , وكمان اعطي فرصة لكل شخص شكاك انة ممكن يرجع ويبقي قديس عظيم كمان وربنا هيحترم انة شخص عقلاني و هيتعامل معاه بالعقلانية دي ,
الموضوع جميل وفية تأملات كتير ولكن دى مجرد فكرة ممكن تقسيها علي كل حاجة في خدمتك , احرص علي انك تحافظ علي التنوع الجميل من اجل مجد اسم المسيح
اندراوس عبدالمسيح
