كتب - محرر الاقباط متحدون
قال المفكر والطبيب خالد منتصر :" البهائي والبهائية في مصر محرومين من أبسط حقوقهم؟ ، إزاي نتكلم عن حقوق الانسان وهما بيتعاملوا بهذا القدر من التهميش ؟ لازم الدولة تغير من نظرتها لهم عشان دول مواطنيين مصريين مسالمين لهم حقوق زي أي مواطن مصري من أي ديانة، وما تقولوليش عددهم كام لان مش العدد هو اللي حيحكمني عشان أعامل أي حد كانسان له حقوق مواطنة .
مضيفا عبر حسابه الرسمي على فيسبوك :" هما عشرتلاف تقريباً بس هما لو تلاته في مصر لهم نفس حقوقك برضه ، ليا صديقة بهائية حتعمل فرحها في تركيا لانهم هنا مش ممكن يجوزوها زواج مدني لانها والعياذ بالله بهائية!!وأمها آنسة في البطاقة الأم لا عرفت تورث ف ابوها ولا بنتها حتقدر تورث فيها ، والفلوس حتتصادر لانها ماتنفعش تورث أم آنسة !!!
وحتتكتب الديانة شرطة
لافتا :" أما في الموت الدولة رافضة بناء أي مقبرة للبهائيين مافيش الا مقبرة ف البساتين هيا اللي كانت ع اسمهم من ثمانين عاماً وازدحمت بالجثث وبيسافر لها البهائي اللي من أسوان يدفن فيها ،
وعندما رفع بهائي اسكندراني قضية للسماح له بانشاء مقبرة في اسكندرية أرسل الأزهر تقريراً للمحكمة يرفض فيه بناء المقبرة منعاً لاثارة الفتنة !!!! في الوقت اللي محمد عبده شكر فيهم وفي شخصية عباس أفندي شيخهم!!! .
وتابع :" بالذمة ده كلام ، الصور المرفقة دي بطاقتين لاتنين سيدات فضليات بهائيات ، منهم د سوسن أحفادها أنجبوا لكنها في البطاقة لسه مكتوبة آنسة!!!!دي مش معجزة طبعاً انها جدة وآنسة ده عار لابد نخجل منه أطالب بانصافهم وأطالب بالغاء خانة الديانة تماماً من البطاقة وأطالب باحترام اختيارات الناس في اعتناق ما يقتنعون به ، ازاي الامارات تبني للهندوس معبد يصلوا فيه ،واحنا نرفض نبني للبهائيين مقبرة يدفنوا فيها موتاهم ؟!!!يا جماعة الكلام ده انتهى منذ العصور الوسطى،بقى في المتاحف دلوقتي، ملحوظة:بيكار واحد من أهم رسامي مصر وأكثرهم أخلاقاً وأدباً وموهبة ، كان بهائياً .
#جدة_لكنها_آنسه_يحدث_في_مصر_فقط!
#البهائية_عورة_وجريمة_في_مصر
#البهائي_مواطن_مصري_مسالم_وليس_عدواً
#البهائيون_غير_مسموح_لهم_ببناء_مقبرة!!
