ديفيد ويصا
وصلت في خلوتي مع الكتاب المقدس لسفر القضاة، ١٣
واللي بيحكي قصّة مَنوح ومراته العاقِر، أبو وأم شمشون ..
لما الله بشَّرهُم بولادة شمشون، ووصّاهُم على طريقة تربيته ..
والقصّة بتحكي عن زوج وزوجة، على النَّقيض من آدم وحوّاء ..
وقادر اشوف على الأقل ٥ فروق!
--
(١) آدم وحوّاء كانوا في ظروف حلوة ..
وكانوا أحرار مش مُستَعبدين لحد ..
منوح ومراته كانوا في ظروف صعبة ..
وكانوا مُستعبَدين للفلسطينيّين (آ١)
--
(٢) الوصيّة كانت من الله لآدم، وغالبًا فالها لحوّاء ..
لكن الوصيّة هنا كانت لمرات منوح، وقالتها لمنوح (آ٣-٥)
--
(٣) حوّاء سمعِت كلام إبليس ..
وادِّت آدم من ثمر الشجرة المُحرَّمة ..
لكن مرات منوح سمعِت لكلام الله ..
وراحت لجوزها تحكيله (آ٦-٧)
--
(٤) آدم سمِع لكلام حوّاء المناقض لوصيّة الله ..
وأكل من ثمر الشَّجرة المُحرَّمة اللي منعه منها الله!
منوح سمِع كلام مراته وصدَّق اللي قاله الله ..
وصلَّى لله، عشان يرشده أكتر لطريقة تربية شمشمون (آ٨)
--
(٥) آدم وحوّاء كانوا عايشين مع الله، وكان البديل الموت ..
منوح كان فاكر انه هيموت لأنه شاف الله (آ٢٢)
لكن مراته طمِّنتُه ان الحياة من نصيبهم، لأنهم شافوا الله (آ٢٣)
--
الحاجة اللي فارقة معايا جدًّا في الإصحاح ده ..
إن رغم الضَّلمة اللي مالية سفر القضاة ..
لا زال الله ليه ناس بيتعامل معاها بصورة فرديّة ..
وبينوَّر ليها وبيها رغم الضَّلمة!
ورغم الشَّر اللي مالي السِّفر، من رجال ونساء ..
يفضل الله ليه نساء ورجال، واقفين ضد الشَّر!
وان كانت حوّاء غلطِت، وآدم غلط معاها ..
مرات منوح أطاعت، ومنوح أطاع معاها!
ومهما كانت الظروف سهلة، ده مش ضمان للطاعة ..
ومهما كانت الظروف صعبة، ده مش هيمنع الطاعة!
--
وتفضل مرات منوح نموذج لكل بنت بتحب الله وعاوزه تطيعه ..
ويفضل منوح نموذج لكل راجل بيحب الله وعاوز يطيعه!
#من_خلوتي_ديڤيد_ويصا
