د. أمير فهمى زخارى
هو مريض السكر ينفع ياكل عنب، وايه افضل نوع ليه، و ياكل منه اد ايه ؟؟!!
طيب ، اولا لو بنقارن ما بين سكر الفاكهة (زي العنب )و السكر الابيض الموجود في الحلويات ، فأكيد سكر الفاكهة افضل لأن امتصاصه ابطء من السكر الابيض ، فلو عايز تحلي بحاجة ، و بتسأل نفسك عنب مثلا و لا شيكولاتة او بسبوسة و غيرها من الحلويات ، يبأه عنب طبعا .
نيجي بأه للعنب نفسه ، دراسات كتير قالت ان ماده الريسفيراترول الموجوده في العنب ، و خاصه الاحمر و بالتحديد في القشره و البذر، بتحسن من عمل الانسولين في الجسم و بالتالي بتساعد علي دخول السكر للخلايا و ضبط مستواه في الدم ، وكمان بتحمي خلايا بيتا المنتجة للانسولين في البانكرياس، و بتزود انتاج الانسولين منها .
لكن ما ننساش طبعا ان محتواه من سكر الفاكهة، مش قليل ، فنجان العنب اللي هو حوالي ١٥٠ جرام ، فيه حوالي ٢٣ جرام سكر ،بس هنا في ميزه مهمه جدا انه فيه الياف بتبطء امتصاص السكر ده ، فالمؤشر الجليسيمي للعنب مش عالي ( منخفض لمتوسط ، ٤٩ -٥٩ حسب نوع العنب)يعني امتصاص السكر منه مش سريع و عشان كده ✋الاعتدال مهم جدا يا جماعة ، يعني لا حرمان مطلق من العنب ولا اكل براحتنا منه، مريض السكر ممكن ياخد منه كل يوم ،لكن باعتدال ، و التوصيات العلمية ب ١٥ حبه صغيرين من العنب ( ما يعادل نص فنجان ) دول فيهم حوالي ١٢جرام سكر ، و كده تكون كمريض سكر انبسطت بطعمه و مش محروم من العنب و لا فوايده الكتير اللي قلنا عليها في البوست
👈و ضروري مريض السكر ، يقيس السكر بعد اكله بساعتين، لو كان ١٨٠ او اقل ، يبأه الكمية دي مناسبة ، و اذا كان اعلي من ١٨٠ ، يبقي العنب بيعلي السكر😌 و هنا لازم يقلل الكمية.
👈طيب انهو نوع افضل لمريض السكر ، الاخضر و الاصفر ( مش الاحمر )لان الاخضر محتواه من السكر اقل ( لكن الاحمر و الاسود فيهم مضادات الاكسدة اعلي )
فواكه صديقه لمريض السكرى هى:
البطيخ والشمام والخوخ والتفاح والبرتقال واليوسفى والكمثرى والفراوله والموز والمشمش والجوافه والبرقوق والرمان...
تحياتى للجميع.
