ماجدة سيدهم
أيوه هو المصري بعينه اللي تاريخه العريق  بيؤكد أنه معجون بتراب أرضه.. والوحيد اللي  تراثه ربط بين الأرض والعرض ..يعني الأرض مرتبطة  بمفهوم الشرف والرجولة  ..

وياعيب الشوم  هو فيه مصري برضه يسيب أرضه ولا زرعته ويفوتها كدا ويهج مهما كانت الضيقة كبيرة وجارت عليه الأيام.. دا كل المشاكل بتختفي أدام قيمة الأرض والوطن..

فاكرين  الفلكور الشعبي الشهير " عواد باع أرضه شوفوا طوله وعرضه .."

أيوه المصري طول عمره بسيط  وقنوع  ويكفيه أوي حته هدمة ولقمة بملح  أو بدقة ويديمها نعمة ..بس مستحيل  يترك أرض أجداده ولا أهله ولا ناسه أو يتخلى عن أمانه وستره ..

 المصري مهما اتغرب ومهما حقق لكن حنينه لأرضه صادق وريحة ذكرياته عفية  ووصيته أن ينضم جنب من رحلوا  بتكون رغبه  حقيقية..لأنه مصري عريق ..
 
  عارفين فيلم الأرض  ..هو كدا بالظبط .. كل الحبايب حوالينا سابوا بلادهم وجم على مصر ..لكن المصري  عمره ماينحني ويموت وهو متبت في ترابها .. وحاجات كتير أوي ..

وتعيشي يامصر  بحكمتك وتاريخك وشرفك ورجالتك . وتعيشي يامصر بعيشك وملحك وطيبة قلبك  وضحكتك..

عرفتوا ليه العين على مصر .. ربنا يحفظ بلادنا الغالية أوي ويحمي شعبها الطيب ..