محرر الأقباط متحدون
علق الإعلامي عمرو أديب على تصريح رئيس الوزراء في المعرض والمؤتمر الدولي للنقل الذكي والبنية التحتية، بشأن إسناد بعض المطارات والموانئ للقطاع الخاص، قائلًا: "أنا بنادي بده من زمان من سنوات طويلة".
وأضاف أديب خلال برنامج "الحكاية" المذاع على قناة "إم بي سي مصر": اللي أنا عايزه انه يكون هناك جدية في إسناد بعض المطارات والمواني للقطاع الخاص، واتخاذ هذه الخطوة، خلاص مفيش دول بتدير هذه الأشياء، وانت بتنزل في مطارات عالمية تديرها شركات لدول أخرى تحمل علما مختلفا عن علم الدولة اللي فيها، واتحدث عن مطارات أوروبية وأمريكية ومواني أجنبية في الشرق الأقصى وأماكن كثير.
وتابع: "فلتخرج الدولة من إدارة الأشياء والتمسك بتلابيب المؤسسات لأغراض تاريخية ونفعية قصيرة، آن الأوان يبقى عندك مطار يتم ضخ فيه أموال وخبرات ودم جديد، نحن مطاراتنا كلها بتدار بنفس الطريقة علي مدى عشرات السنين ومفيش تقدم لكن محتاجة استثمار وتكبر، والحقيقة الدولة مدير فاشل".
وأكمل: "آن الأوان نخرج من عباءة الحكومة، الدولة تنظم والقطاع الخاص يدير وتعمل مناقصات ويبقى فيه تطوير والدنيا تكبر، احنا مش جايبين حد هنديله مفتاح البلد ونروح ولكن احنا بنظم القوانين وبنوجه القطاع الخاص يعمل التطوير والرؤية التنموية اللي احنا عايزينها لتنشيط السياحة ودعم الاقتصاد، يعن مثلا نعمل مناقصة ونقول مين عايز يدير مطار القاهرة الدولي ونبتدي نجرب في صالة 1 وصالة 2 وصالة 3 ولتأتي إلينا الخبرات الدولية".
