ديڤيد ويصا
قلتلهم:
أنا دايمًا بفكَّر نفسي بحاجتين بيرعبوني ..
الحاجة الأولى:
يا "ديڤيد" ..
الناس في الكنيسة قابلينك عشان ..
يا إما انت شبههم، يا إما عشان بتقول كلام بيعجبهم ..
أول ما هتختلف عنهم، أو معاهم ..
محدِّش هيجيبك لخدمة كلمة تاني ..
بس فكَّر نفسك انك بتخدم الله، مش الناس ..
باب الخدمة اللي بيفتحه الناس، ممكن يقفلوه ..
لكن أبواب الخدمة اللي بيفتحها الله، محدّش يقدر يقفلها!
--
الحاجة التانية:
الناس في الكنيسة بتصنَّف الغلطات ..
فلو شافوك بتشرب سيجارة، مش هيجيبوك تخدم تاني ..
لكن لو شافوك بتاكل أكل مُضِرّ ..
وجايب لجسمك ضغط وسُكَّر وسِمنة ..
هيجيبوك تخدم تاني عادي!
مع إنك في الحالتين ..
بتؤذي جسمك، اللي هو أمانة من الله ..
وبتؤذي اللي حواليك والمسؤولين منك ..
لأنك مش هتعرف تقوم بمسوؤليّاتك ناحيتهم!
--
الكنيسة لازم تكون مجتمع آمِن ..
عشان لما تخافوا من الناس اللي برَّه ..
تقدروا تيجوا تلاقوا الأمان فيها ..
لكن لو ملقيتوش الأمان في الكنيسة ..
مش هتلاقوه في حتَّة تاني!
ومشيت!