حلت الفنانة فاطمة كشري ضيفة ببرنامج "المنسي" مع الإعلامية إنجي هشام على شاشة "هي"، وكشفت عدد من الأسرار عن حياتها مثل تعرضها للعنف المنزلي وخلافات لها في الكواليس.
قالت فاطمة كشري أنها لم تفضل التمثيل على زوجها ولكن مع ذلك اعتدى عليها بالضرب بسبب التمثيل،وحكت: "أنا قلتله بحب الفن واضربت كتير، قاللي يا تشتغلي بالنهار يا تنزلي المسرح بالليل فاختارت المسرح لأنه له احترام والجمهور بيديك حقك والفنانين فاتحين أوضهم لينا كأننا أسرة واحدة".
وأضافت فاطمة كشري: "جوزي ضربني وإيدي اتجبست وكملت معاه 37 سنة لحد ما ربنا خده في سن الـ61".
كما روت فاطمة كشري عن المرة التي دافعت احدى الممثلات عنها في الكواليس: "أثناء تصوير "أحلى الأوقات"، اتلخبط من حلاوة ليلى علوي، والمخرجة كانت ست جميلة وبتقولي شاطرة يا بطة، بس كنت كل شوية أنسى كلمة، لقيت مساعد المخرج اتعصب وزعق، قلتله بس السلام عليكم، انت بتزعقني ليه؟ راحت ليلى علوي تهديني".
وتابعت فاطمة بالحكي عن موقف حين صاح مساعد مخرج أثناء تصوير "عايزة أتجوز": "كنت بقول لهند صبري الجميلة "افتحي الشبابيك والبلكونة، مين هيجيلك وانت مقفلة كدة؟"، فنسيت كلمة شباك، راح المساعد مزعقلي، وصعب عليا إنني وقفت التصوير وعيطت، راحت هند صبري مسحالي دموعي وقرأتلي القرآن".
وكشفت فاطمة كشري عن قصة دخولها لمجال التمثيل: "كنت رايجة أشتري تلاجة في شارع 26 يوليو لاقيت ناس كتير دخلت وسطهم أشوف في إيه قالولي دول بيمثلوا، بص لقيت أستاذ تركي رحمة الله عليه وأولاده قولتلهم عايزة أشتغل معاكم، قالولي إنتي جاية بعافيتك علينا؟ روحي النقابة".
وتابعت: "لما روحت النقابة طلبوا مني صورتين و6 جنيه وصورة بطاقة، وأول شغل اشتغلته كان "صراع الأحفاد" وتاني شغل كان "كتيبة الإعدام" مع الأستاذ نور الشريف، وكنت فرحانة أوي، وبعد كده اشتغلت مع أستاذ عبد الله غيث الله يرحمه وسناء مظهر".
