د. أمير فهمى زخارى المنيا
كثير من الكلمات اللى بنرددها ولا نعرف أصلها ولا فصلها وهل هى عربية في الأصل ام أعجمية وكلام كتير، رايح جاي علينا، مفكرناش مرة، هو دا جه منين، هتفرق طبعا اننا نعرف اصل الكلمة، هيبقي ليها معني اكبر واحسن لو نطقنا واحنا عارفين اصلها،
كمان فيه جمل كتير غلط وبالرغم من كده مازلنا نقولها ومتمسكين بيها، أنا كتبت بعض هذه الجمل الخطأ وكتبت الجمل الصح، من باب المعرفة والثقافة الصحيحة..
1- اسمها اسأل مجرب ولا تنسى الطبيب
مش ولا تسأل طبيب
2- اسمها من علمني حرفا صنت له عهدا
مش صرت له عبدا
3- اسمها ابعد عن الشر وقن له بمعنى أحفر بينك وبينه قناة
مش وغنيله
مش فاهم هنغني للشر ليه؟!
4- اسمها كتر السلام يُجل المعرفة من الأجلال والتوقير
مش يقل المعرفة
5- ماسمهاش نعم يادلعادى
اسمها نعم يا الد اعدائى
6- معلش:
أصلها ما عليه شيء وتم تحريفها لمعلش، وقيل ان أصل استخدمها كان للقاضي عندما يحصل شخص على البراءة فيقول (ما عليه شيء) وقيل ايضا انها كانت تقال للمجنون أو السفيه ما عليه شيء أي (معلهوش عتاب) ومع مرور الوقت فقدت معناها واصبحت تعبير عن الأٍسف
7- ماسمهاش طور الله فى برسيمه
أصلها ثور لاه في برسيمه بمعنى ملهى ومشغول فيه أي مشغول بالبرسيم والأكل؛ ثم تحرف لـ (طور الله في برسيمه) وأصبح مثل يقال للشخص إلى مش عاوز يفهم ولا يقتنع.
8 - مااسمهاش انا كافي خيرى شرى
اسمها انا كافي غيرى شرى
9- ياليل يا عين:
مش المقصود بيها الليل بتاعنا.
الجملة اللى بتتغنى ديما في معظم الأغانى أصلها فرعونى ليل بالفرعونى معناها الفرح .. ومعنى الجملة اللى بيغنيها الفراعنة وورثناها عنهم ” افرحى ياعين ” لما ترينه.
10- يالهوى\يالهوتى:
هى كلمة بتعبر عن الندم أصلها بقى كان فى قرية ريفية من زمان كان فيه راجل دجال اسمه (لهوى) ولما تحصل اى حاجة او اى مصيبه كانوا بيجروا عليه ويقولوله الحقنا يا لهوى ومن سعتها وبقى لما تقع فى اى نصيبه او اى حاجه بنقول يا لهوى.
11- أنت أهبل.. وعبيط .. وتنح
دول ثلاث كلمات متداولة يوميا تقريبا يرجع أصلهم لثلاث لغات مختلفة من حضارات متنوعة
فالكلمة الأولى "أهبل": يونانية مأخوذة من كلمة “هابلوس” ومعناها ساذج،
والثانية "عبيط": فرعونية مكونه من كلمتين عا و بيت، “عا” تعنى حمار، و”بيت” تعنى شخصية، أى حمار الشخصية،
والثالثة "تنح": قبطية مأخوذة من (تناهو) ومعناها يستحى او يخجل.
12- يا خراشى:
يرجع عمر هذه الكلمة لألف سنة في عهد الدولة الفاطمية، وأصل هذه الكلمة تنبع من أن أول شيخ للأزهر كان يسمى بالشيخ محمد الخراشي؛ وكانوا ينادوه اذا وقع ظلم او حين تحدث مصيبة يقولون: يا خراشي
يارب نعرف معنى الكلام قبل ما نردده واحنا مش عارفينه...تحياتى للجميع.
د. أمير فهمى زخارى المنيا
