د. أمير فهمي زخارى المنيا.
المقصود بالكناية أن يتكلم المرء كلامًا أو يقول قولًا يعني به غير ما يقول أو يتكلم، أو ما يدل عليه ظاهر اللفظ.
وفى هذا البوست أكتب اليكم بعض الكلمات المستخدمة والكنايات (المعاني اللغوية) لكلمة يد أو الإيد وعلي سبيل أمثلة الكلمات و معانيها كالتالي …….. أتمنى أن ينال اعجابكم...
كنايات عن اليد:
- إيدو بيضا: يعني صاحب فضل وخير ومعروف.
- إيدو ماسكة: بخيل.
- إيدو خضرا: يزرع وتُثمِر زريعته.
- إيدو طايلة: بيقدر يعمل حاجات كبيرة.
- إيدو واصلة: واسطة قوية (عضمه جامده).
- إيدو طويلة: حرامي، يؤذي من حوله.
- إيدو خفيفة: حرامي محترف أو شاطر.
- إيدو مخرومة: مبذر، مسرف.
- إيدو علي قلبه: بيخاف كتير.
- إيدو والكف: عصبي، مفيش تفاهم معاه.
- إيد ورا وايد قدام: مفلّس وما ممعهوش حاجه.
- على حطة ايدك: زي ما أنا مفيش تغيير.
- اللي ايده ف الميه مش زي اللي ايده ف النار: مش حاسس بيا.
- ماسكه من ايده اللي بتوجعه: ماسك عليه زلّه.
– إيدي علي كتفك: انا معاك أهوه، ياريت.
– إيدي متكتفة: عاجز إني اعمل حاجه.
- ايد واحده ما تصقفش: لا أستطيع منفردا، معناه في الاتحاد قوه وتكامل.
-ايده فرطه: كر يم وسخي.
-ايدك معايا: ساعدني.
-ايدي ف زورو: صارف عليه (عازمه ألف مرة).
-تسلم ايدك: ألف شكر.
-ايدك منه والارض: مفيش منه فايدة.
-ايدك ع المعلوم: هات فلوس.
-الايد قصيره: يعني مفلس.
-ايده تتلف في حرير: شاطر الأداء.
-جاي وايده فاضيه: ماجابش حاجه.
-عصفور في اليد: فرصه لا تعوض
- تسلم إيدك: يعني الحاجة دي مضبوطة.
الإيد البطالة نجسه: اليد التي لا تعمل غير طيبه, قاعد مابيشتغلش حاجة.
- طلب ايدها: طلبها للزواج.
- إيده على خده: دلالة على التفكير والحيرة.
- إيده في جيبه: دلالة على الاستعلاء واللامبالاة.
- مليش يد في الموضوع: يعني بريء من التهمه.
- ايدك وخودها: يعني سلم عليا بأيدك.
يا ترى نسيت حاجة؟!
كلمة” الإيد” في اللهجة المصرية كلمة ملهاش مثيل.
والى اللقاء في كنايات لكلمات وجمل جديده، أتمنى لكم قراءه ممتعه ووقت سعيد... تحياتي.
د. أمير فهمي زخارى المنيا.
