ماجدة سيدهم
لازم نعرف كويس أوي أن فيه فرق بين الإعجاب والحب والشهوة ..
ولازم نعرف أن أصعب وأهم مسؤولية في الكون هي مسؤلية الحب ..لذا
* بحق البيوت المقفولة على أسرارها ومتربس أبوابها على العناد والعنف والخوف ..

* بحق زحمة المحاكم بشباب لسه متجوز وعيال متجرجرة وراهم على السلالم ومن التعب بيناموا  في المررات والمرمطة بين أماكن الرؤية  ومش فاهمين ليه ..

* بحق الجريمة المتفشية في المجتمع واللي لايحاسب عليها القانون " لازم نتجوز ..ولازم نخلف ومليون لازم بتجهدنا  وبنجني من وراها سقوط بيوت
وهزيمة أجيال
* بحق المجرم اللي نشر في الشوارع ثقافة أن الحب قباحة ونجاسة وعيب وأن الشرف في المخاصمة على شوية بسملات على عبايات على تعاويذ  واكتئاب ..

* بحق استغلال الظروف والتلاعب بمصير البسطاء  ..

 *  بحق العبوس اللي على الوشوش والكراهية اللي دغدغت  الشوارع  وزودت أكوام القمامة والسباب ولعن الأيام والبلاد
* بحق المشاعر اللي بقت لعبة أو مصلحة ..

*بحق الغلاء والوباء  وسيف الانتقام المعشش في النفوس
* بحق القمح اللي هجر أراضينا  والنيل اللي اتقتل بكل الاحتقار وبكل الملوثات ..

بحق انتهاك  الخصوصيات والإنسانيات ..
* بحق انتحار الفكر والفنون والفلسفة والمواجهة .

* بحق الغش في المعاملات والمنتجات والامتحانات والانتخابات وصلاحية التزوير في أوراق رسمية واستغلال النفوذ
* بحق سرقة مجهود الغير وتسلط مبدأ البقاء للعنتري
* بحق المطاطية لحثالة علشان المصلحة تمشي  

* بحق تناقض الذمم والأراء .
 كفاية  دباديب وقلوب حمرا وكفايةأقنعة بكل الألوان ونجرب نحب بجد ..ماتخافوش من الحب ..دا العمر قصير أوي وهيتحسب علينا ..
الحب بيسقط كل الأقنغة وبيخليك حقيقي ..

الحب بيطهر و بيحرر ..الحب صحي وبيعطي وبيشفي وبيشجع  وبيفرح  وبيغفر وبيطلع أجيال سوية وناجحة ..
أيوه الحب صعب جدا لكنه هو الضرورة ..والعيشة من غيره مرض  ومرار ..