أقرت إسراء.ص، المتهمة الرئيسية في واقعة مقتل اللواء اليمني حسن العبيدي مسؤول في الجيش اليمني، بتفاصيل جريمة التخلص منه وسرقته عقب اتفاقهما معه على ممارسة أفعال غير أخلاقية، ومع زوجها على استقطاب أي زبائن للخروج بأموال، فساق القدر الضحية اليمني في طريقها، واتفقت معه على موعد غرامي.
وحصل القاهرة 24، على التحقيقات الكاملة ونص اعترافات المتهمين في قضية مقتل اللواء اليمني حسن العبيدي، داخل شقته بمنطقة فيصل بالجيزة، وهم 5 أشخاص، بينهم 3 سيدات.
تحقيقات قضية اللواء اليمني
وروت المتهمة بداية تفاصيل الجريمة بقولها: أنا كنت شغالة بتعرف على الرجالة عشان أعمل معاهم علاقات جنسية بفلوس واتعرفت على رمضان محمد في الشغلانة اللي بشتغلها دي وحبينا بعض واتفقنا إننا نتجوز وفعلا اتجوزنا عرفي وفضلنا قاعدين في الفيوم عنده في بيته حوالي شهرين.
وتابعت: وبعد كده قررنا نرجع على القاهرة وأنا عرفته على أهلي وهو قالهم إن إحنا اتجوزنا عرفي وبعد كده رمضان أجر لنا شقة في إمبابة وفضلنا قاعدين فيها حوالي 4 شهور وكان حالتنا المادية ماشية لإن هو كان شغال مع جوز أمي في فرش العربيات.
واردفت المتهمة بارتكاب الجريمة: بعد كده الدنيا بدأت تزنق معانا فأنا اقترحت على رمضان إن أرجع أنزل أشتغل تاني في شغلانتي مع الرجالة نعمل مصلحة نمشي بيها حالنا علشان الفلوس كانت مزنقة معانا جامد لدرجة إن إحنا قعدنا 3 أيام مكناش بناكل ورمضان وافق على موضوع شغلي ده واتفقنا إني هنزل لو لقيت أي زبون هركب معاه اقعد معاه في العربية شوية أو أروح معاه الشقة ورمضان هيديني منوم يكون معايا بحيث إني أكون سهيت الزبون وخدرته ويجي رمضان يسرق اللي معاه".
أكملت المتهمة: نزلت قبل موضوع الراجل الخليجي ده بيومين ألف في الشوارع بتاعت المعادي والمنيل بس محدش وقفني وفي تالت يوم اتعرفت على الخليجي اللي مات وأنا بتمشى على كورنيش النيل الساعة واحدة ونص الصبح لقيت عربية ملاكي لونها فيراني وقفت عندي ولقيت اللي سايقها بينده لي فرحت ركبت معاه وقعد يتكلم معايا وفهمت من لهجته إنه مش مصري وإنه خليجي وطلب مني إن هو يمارس معايا وهيديني 4 آلاف جنيه فأنا قلت له ماشي اطلع بينا على الشقة فراح قايلي لأ خليها بكرة أنا رايح أقعد مع أصحابي وأنا لما بصيت في العربية اللي هو راكبها لقيت معاه هدايا كتير ففهمت إنه غني".
أضافت المتهمة: قلت أطلع منه بأي مصلحة وفضلت راكبة معاه في العربية وهو عمال يمسك في أماكن حساسة لحد ما وصلني بالقرب من بيتي وأنا نزلت بعد لما أخدت منه رقم تليفونه وأديته رقم تليفوني واتفقنا إن أنا هروح له تاني يوم، ولما روحت حكيت لرمضان على اللي حصل معايا وعلى الراجل الخليجي المتريش اتفقنا إن إننا نطلع منه بأي مصلحة لأن هو راجل غني ومتريش ومش هيعرف يعمل معانا أي حاجة ومش هيعرف يجيبنا تاني وفضلت قاعدة في البيت لغاية لما جالي رسالة على التليفون إن الراجل الخليجي حاول يتصل بيا فأنا رحت مكلماه على التليفون وقاللي إنه عايزني أروح له أنا وبنتين كمان عشان معاه واحد صاحبه وهيدينا فلوس كتير أوي وانا قلت له أنا مش معايا غير أختي بس فراح قاللي ابعتي لي صورتها فرحت بعتاله صورة وقلت له إن هي دي أختي فعجبته وقاللي تعالوا انتو الإثنين وراح بعت لي لوكيشن بتاع بيت صاحبه، فأنا رحت حكيت لرمضان على اللي قاله ليا فقاللي انتي هتروحيله انتي وأختك واحدة تشاغله وواحدة تحط له المنوم لغاية لما ينام وأول لما ينام هيطلع هو وعبد الرحمن جوز أختي يسرقوا الشقة وننزل كلنا".
أردفت المتهمة الرئيسية في الجريمة: اتفقنا إن لو الراجل قاوم ولا حاجة هنسكته ونكتفه لغاية لما يبطل أي مقاومة علشان ما يفضحناش، واتفقنا أنا ورمضان على الخطة دي وكلمت مرات أبو سهير وسألتها عليها هي فين قالت لي إن هي لسه راجعة من برة ونايمة هي وجوزها عبد الرحمن فرحنا أنا ورمضان على بيت سهير ولما قلنا ليهم على موضوع الراجل الخليجي وعلى الخطة اللي إحنا حطناها وافقونا عليها وقالو لينا إن هما هينفذوا الخطة دي معانا علشان يطلعوا برده بأي مصلحة وركبنا أنا وسهير تاكسي واتحركنا على بيت الراجل الخليجي وكان ماشي ورانا رمضان وعبد الرحمن".
دالجدير بالذكر أن محكمة جنايات جنوب الجيزة، قررت منذ قليل تأجيل محاكمة 5 متهمين بقتل اللواء اليمني حسن العبيدي، وسرقته داخل شقته بمنطقة فيصل بالجيزة، لجلسة 6 مارس لاستعداد مرافعة الدفاع، والتنبيه علي الباحث الاجتماعي بإعداد التقرير اللازم للمتهمين الأطفال الثاني والرابع.
وكانت الأجهزة الأمنية بوزارة الداخلية، كشفت ملابسات ما تبلغ بتاريخ 18 الجاري لمديرية أمن الجيزة من شخص يمنى الجنسية، بعثوره على جثة شقيقه، بداخل شقته حال تردده عليه لعدم تجاوبه معه منذ يومين سابقين.
وأسفرت التحريات وجمع المعلومات عن تحديد مرتكبي الواقعة وهم كل من رمضان محمد 29سنة، سائق ومقيم المنيرة الغربية بالجيزة، سبق اتهامه في العديد من القضايا أبرزها قتل وسلاح دون ترخيص وسرقة وإتلاف عمد، وعبدالرحمن أشرف شحاتة مصطفى وشهرته عبده عسلية سن 19 خراط ومقيم الطوابق بالجيزة، وإسراء صابر محمد عطية وشهرتها دينا سن 22 ربة منزل ومقيمة منشأة ناصر بالقاهرة، وسهير عبدالحليم محمد عبدالحليم وشهرتها منة سن 17، ربة منزل ومقيمة منشأة ناصر بالقاهرة.
