د. امير فهمي زخاري المنيا
الكل مستغرب ازاي مراهقين وشباب يجيلهم جلطات قلب وجلطات مخ، ويموتوا بأزمات قلبية؟؟‼️
علشان كده كتبت مقالي اليوم عن قصه السمنه البلدى والصناعى..
نبتدئ بالسمنه البلدى:
اللبن الجاموس أو البقري عبارة عن مستحلب.
وكلمة مستحلب يعنى ماء ودهن مع بعض لو أنت سيبت اللبن ساكن او حطيته بالتلاجه بيفصل الماء عن الدهن ويطلع اللبن دسمه.
والحقيقة فيه دراسات كتير خالص بتنادي الناس ان لا تستخدم إلا اللبن كامل الدسم علشان الفيتامينات الذائبه فى الدهن.
المهم الدهون بتطلع فوق والماء ومكوناته بتكون تحت وبتطلع القشطه أو كريمة اللبن.
كريمة اللبن أو القشطة بالخض بتتحول لزبدة والزبدة دى عبارة عن ماء وسمنة وشوية بروتين ونشويات بسيطة.
أمهتنا بيسخنوا الزبدة مع الملح عشان يطلعوا السمنة صافية ويطلع الباقي المورتة أو عجوزة اللبن ودي مغذية جدا جدا جدا نشويات على بروتين وطعمها مملح ورائع بمعنى الكلمة.
نيجي بقه للسمنه الصناعي:
الإمبراطور نابليون الثالث امبراطور فرنسا أيام ما كانت إمبراطورية، كان عاوز بديل رخيص للسمن الحيواني(البلدي) ، علشان يأكله لجنود الجيش والطبقات الفقيرة اللي متقدرش على سعر السمن البلدي!!!
فعمل تحدي بين علماء الكيمياء لإختراع البديل ده، فضلوا العلماء يحاولوا إيجاد البديل، لغاية ما عالم إسمه هيبوليت اخترع أول سمن نباتي سنة 1869..
طبعا مكانش بشكل السمن النباتي اللي نعرفه حاليا، كان أبيض اللون تماما، وريحته مختلفة عن ريحة السمن البلدي، وقوامه كمان مختلف وكذلك طعمه؟‼️
لكن الطبقات الفقيرة رضيت بيه واستعملته على حاله كده في مقابل سعره الرخيص، لأنه وقتها مكانش حد يعرف ضرره؟؟؟
واستمر الحال على كده لغاية ما السمن النباتي وصل مصر، ودلعناه وسميناه النباتين من باب جبر الخواطر، والكبار شوية من حضراتكم ممكن يفتكروا كويس إنه زمان كان استعماله فعلا قاصر على الطبقات الفقيرة أو المعدمة، لدرجة إن البعض كانوا بيتكسفوا يقولوا إنهم بيستعملوه...
بعد شوية الشركات المنتجة حبت تزود مبيعاتها وتشجع الطبقات الأغنى كمان على استعماله، فأضافوله لون وطعم وريحة وترميره علشان يدوله خواص السمن البلدي، وكمان عملوله دعاية بتقول إنه صحي أكتر من السمن البلدي...
يعني الدعاية بتاعته كانت قائمة على إنه (خالي من الكوليسترول) وبيحافظ على صحة القلب والشرايين وبيحمي من الأمراض، فاللي مش هيستعمله علشان رخيص، يستعمله علشان(صحي)!!!!
وبمرور الوقت ابتدى يشيع استعماله وينتشر ومبقاش حد بيتكسف يقول إنه بيستعمله ولا حاجة، ببساطة بقى مقبول اجتماعيا!!!
طيب إيه علاقة الحدوته دي بانتشار أمراض القلب والجلطات اللي حكينا عنه في بداية كلامنا❓❓.
ببساطة إنه مؤخرا من كام سنة كده، أبحاث علمية كتيرة جدا أثبتت إن السمن الصناعي بيرفع معدلات الإصابة بأمراض السكر والقلب و تصلب الشرايين والجلطات بأنواعها...
لأن الدهون المتحولة ده بالنسبة للجسم مركب غريب، إنزيمات هضم الدهون اللي ربنا خالقهالنا مش بتشتغل عليه أصلا، الجسم لا بيعرف يهضمه ولا بيعرف يتخلص منه، فيتراكم في الجسم ويسبب البلاوي دي كلها..
للأسف الشديد أكتر من 90% من المنتجات الغذائية اللي كلنا عايشين عليها، بتحتوي على السمن الصناعي!!!
المخبوزات والمعجنات ماعدا الخبز - البسكويت والحلويات - البطاطس المقلية (الشيبسي) - منتجات الألبان زي الكريم كراميل الجاهز والآيس كريم وغيره.
منتجات الكاكاو، زي الشيكولاتة وكريمة الشيكولاتة ومشروبات الشيكولاتة.
مبيض القهوة سواء هو نفسه أو خلطات القهوة الجاهزة المحتوية عليه زي النسكافية بالكريمر واللاتيه والكابتشينو والفرابيتشينو وخلافه، وكذلك الشاي بالكريمر‼
منتجات اللحوم والدواجن المتبلة الجاهزة، زي البانية والناجتس والاستربس وخلافه - الوجبات السريعة طبعاااا ....
ولو فضلنا نذكر في المنتجات اللي دهونها متحولة ممكن نفضل هنا لبكرة، الخلاصة إنه مع كوننا بقينا عايشين على كل ما هو مصنوع خارج المنزل سواء مغلف أو إنتاج مطاعم أو مخابز، فكلنا بقينا بناكل الدهون المتحولة دي بشكل أو بآخر…
يا جماعة، لما تيجوا تشتروا أي منتج بصوا على مكوناته📄، لو لقيتوا عليه عبارة من دول:⚠نباتي الدهن.⚠ زيوت مهدرجة او غير مهدرجه. ⚠بديل زبدة الكاكاو. ⚠دهون متحولة. كل العبارات دي معناها ببساطة (سمن صناعي)...
لو حضراتكم خايفين على صحتكم وصحة ولادكم بلاش منها، هتقولولي مفيش غيرها‼️ هقول لحضراتكم لأ هو فيه غيرها، لكن غالي…لكن مينفعش نضحي بالصحة في مقابل الفلوس‼ على قد لحافنا نمد رجلينا!!!
غير إن المنتجات اللي بتتعمل بالسمن النباتي دي أصلا مبقتش رخيصة، دي غالية جدا، طيب إيه اللي غاصبنا على كده!!!
طيب يبقى منستغربش بقى لما نلاقي المراهقين والشباب بقوا مرضى قلب وضغط وسكر وكوليسترول وتصلب شرايين، وبقوا مع أي انفعال أو حتى من غير انفعال بتجيلهم جلطة يروحوا فيها!!!!
نتمنى كلامنا يكون حضراتكم فهمتوه...
معظم مشاكلنا الصحية اللي احنا مستغربينها جاية منين🙄، جاية من إننا بطلنا نعمل أكلنا في بيوتنا...
واتعودنا على أنماط الأكل الغربي، فبقينا لا عارفين نشتريها طبيعية لأنها غالية، ولا عارفين نعملها صحية في بيوتنا، ولا عارفين نبطل نشتريها مسمومة من بره، ولا حتى عارفين نقلل استهلاكنا منها فنسيطر على ضررها...
يا جماعة متخافوش من السمنة البلدى أنا مفيش نقطة كتبتها فى المقال ده الا وليها مرجع اللى بيحذرك من السمنة البلدى والله ما يعرف يعنى ايه تغذية...
شيرو لغيركم و عاوزينكوا كلكم أقوياء وعظمكم قوى وبشعر ناعم زى الحرير .
معلومه احب اضيفها للبوست:
- وهى الزبدة فيرن صناعي ..
- وكمان معلومه السمنه الفلاحى اخف وافيد من الزبدة الفلاحى .
- وعلشان غلاء السمنه ممكن تطبخوا بخليط معلقتين زيت عباد شمس ومعلقه سمن بلدى ... خلص الكلام.
- سواء سمنه مهدرجه او غير مهدرجه هى سمنه صناعى ومضره .
دمتم بصحة وعافيه.
د. امير فهمي زخاري المنيا
