د. أمير فهمى زخارى 

 لازم تعرف ان أفضل نوع بن مش البن البرازيلي 
البن البرازيلي واخد سمعه عشان البرازيل من أكبر الدول اللي بتنتج بن علي مستوي العالم والبن مصدر مهم في دخلها القومي 
لكن البن الحبشي أفضل منه بكتير لان البن الحبشي دسم جدا تلاقي على وش الفنجان زيوت من دسامه البن وجماله والبن ده طبعاً سعره غالي وده اللي بيعشقه اللي بيحب طعم ومذاق القهوة...
 
اللي بعده البن الكولومبي وده له ريحه مميزه جدا وده اللي بيعشقه اللي بيحب ريحه البن والقهوة اللي على الرايق مع صوت ام كلثوم او فيروز او موسيقى عمر خيرت... 
 
لكن أفضل انواع البن على الاطلاق هو البن اليمني لأنه فيه كل مميزات اي بن ريحه و طعم ودسامه وقوام بس طبعاً للأسف مش موجود بقاله فترة عشان طبعاً ظروف البلد.. 
 
القهوة مش طعم بس لا طعم وريحه وقوام طبعاً ما فيش حاجة اسمها اروح اشتري باكو بن 
 
روح للي بيطحن البن قدام عينك عشان فيه بن مخلوط كتييييير فول سوداني او اي حبوب وخلاص...
 
وطبعاً اللي بيحب البن المحوج كفاية قوي جوزه الطيب وحبهان كده حلو بلاش تضيع جمال البن في زحمه التحويجه.
 
اللي بيشرب القهوة بن فاتح فاتك كتير انشف شويه واشربها غامق او وسط ...القهوة لازم تكون بن غامق عيب القهوة مش للهزار.
 
ما فيش حاجة اسمها قهوة زيادة كده انت بتهين القهوة جدا القهوة... حلاوة القهوة في طعمها بدون سكر او بسكر خفيف.
 
القهوة بتتعمل بميه ساقعه على نار هاديه مع تقليب خفيف جدا وبرفق (انت مش بتعمل ملوخية) لازم القهوة تاخد وقت عشان القهوة تتعرف علي الميه ويحصل بينهم حب قبل ما تتصب في الفنجان الزجاج عشان تشوف شكل القهوة قدام عينك..
 
القهوة ما بتتشربش على طول، رشفه وتحطها تاني عشان تستمتع بالطعم عيب جدا انك تاكل حاجه جنب القهوة اصلها مش شاي بحليب عيب احترموا ولاد الناس.
 
 القهوة تتشرب مره واحده في اليوم او تلاته بالكتير جدا جدا القهوة مش لب او سوداني مش تسالي يعني كل شويه عايز فنجان قهوة عيب كده ما يصحش.
 
القهوة شيء غالي لابد من انتظاره والاعداد له جيدا، لازم يبقى ليها ميعاد معروف ان ده وقت فنجان القهوة عشان تشتاق ليها وصدقني هي كمان بتشتاق لك.
 
ما فيش حاجة اسمها انا عايز اشرب قهوة عشان افوق، عايز تفوق روح خد دش ساقع اشرب نسكافيه اعمل شقلبظات لكن بلاش تدخل القهوة في مشاكل هي ما لهاش علاقة بيها.
 
القهوة تتعمل في كنكه نحاس بلاش ألمونيوم علشان ما تتفعلش معها وطعمها تغير..
وأخيرا القهوة للاستمتاع لتحسين المزاج واسيبكم مع أغنيه أم كلثوم.. وأفتكرونى...
قهوه وأغنيه...