د. أمير فهمى زخارى المنيا
زمان أيام آبائنا كانت الناس متعرفش غير القهوة، اللي بنقول عليها حاليا القهوة التركي، وكانوا بيعملوها أحيانا فرنسية(باللبن) ودي كانت مفضلة أكتر للجنس الناعم..
العولمة زي ما فتحت ثقافات العالم كله على بعضها في كل حاجة، القهوة برضه نابها من العولمة جانب، وعرفنا القهوة سريعة التحضير، اللي هي النسكافيه...
ومعظم جيل الشباب القهوة بالنسبالهم هي النسكافيه، ونسبة مش كبيرة منهم اللي بيشربوا القهوة التركي...
طيب بعيدا عن مسألة الذوق والمزاج والتفضيل الشخصي و صراع الثقافات ده، مين فيهم صحي أكتر، القهوة واللا النسكافيه؟؟!!!
تعالوا نفهم مع بعض
مبدأيا النسكافيه أو القهوة سريعة التحضير هي حبوب برضه، لكن بتتعرض لدرجات حرارة عالية جدا بآلية معينة علشان تتحول من مسحوق غيرقابل للذوبان في الماء️ إلى مسحوق قابل للذوبان فى الماء،
القهوة التركي مش بتدوب في الميه إنما النسكافيه بيدوب ويختفي تماما زي ما كلنا عارفين...
العملية دي بتعمل في حبوب البن تغيير محتوى، يعني بتغير في تركيبها الكيماوي، إزاي...
- مضادات الأكسدة اللي بتعتبر القهوة من أهم مصادرها، بتقل في النسكافيه عنها في القهوة التركي، صحيح مبتقلش كتير لكن بتقل برضه.
- نسبة الكافيين اللي هو السبب أصلا في إن الناس بتشرب قهوة، بتقل في النسكافيه كتير عنها في القهوة التركي.
- أهم حاجة بتحصل إن درجات الحرارة المرتفعة جدا اللي بيتعرضلها البن علشان يتحول لنسكافيه، بتسبب تكون مادة الأكريلاميد...
مادةالأكريلاميد دي ثبت إنها مسرطنة في حيوانات التجارب، يعني فيران التجارب اللي ادوها المادة دي جالها سرطان، مفيش أبحاث بتؤكد إنها مسرطنة للبشر لكن اعتبروا ضمنيا إنها طالما سببت سرطان لحيوانات التجارب يبقى ممكن تسببه للبشر، خصوصا لو استهلكوها بكميات كبيرة ولفترات طويله...
الأكريلاميد موجود في مواد غذائية تانية كتير مش النسكافيه لوحده، موجودة في كل المواد الغذائية اللي فيها نشا واللي بتتعرض للقلي أو للتحميص، يعني العيش والعيش المحمص والبقصمات والمكسرات المحمصة والمقليات عموما بما فيها البوفتيك والبانيه والسمك المقلي والقرنبيط المقلي علشان بيتغلفوا بالدقيق والبقصمات قبل القلي، ومادة الأكريلاميد دي من الأسباب اللي علشانها بنعتبر السلق هو أفضل طرق طهي الأطعمة عموما، لأن كل الأطعمة تقريبا فيها محتوى من النشويات.
طيب يعني منشربش نسكافيه!!
بصوا يا جماعة، احنا كمجتمعات عربية آفة استعمالنا للأغذية عموما سواء مفيدة أو لها أضرار، مش في استعمالها في حد ذاته، لكن في الإسراف في استعمالها...
احنا استعمالنا لكل حاجة في الدنيا بيتعدى حدود الإستهلاك الآمنة، ولذلك المادة الغذائية اللي تعتبر آمنة للعالم كله️، تيجي عندنا احنا وتسبب مشاكل..
النسكافيه آمن لو هنشرب منه كباية واللا اتنين بالكتير في اليوم، لكن لما يبقوا ١٢ كباية في اليوم زي ما البعض بيعمل وأحيانا اكتر، لازم هيبقى غير آمن لأن ما زاد عن حده حتما هيتحول إلى ضده، والإسراف حتى في المفيد لازم هيحوله لمضر...
لو هنفاضل بين القهوة والنسكافيه فالقهوة تكسب، زي ما لو فاضلنا بين حاجات كتير عندنا وبين حاجات مستوردينها من ثقافات غربية، ثقافتنا اللي هتكسب، بس للأسف احنا رافضين نقتنع...
أتمنى للجميع بدوام الصحة والعافية ولجميع
المرضى بالشفاء العاجل
---------------------------------
المصادر:
- روشتة دكتور كشكول.
- اليوم السابع..الإثنين، 28 فبراير 2022
- هانى الناظر بوابه أخبار اليوم..2022-03-11
