محرر الاقباط متحدون
شريف جابر .. دافع الدكتور خالد منتصر الكاتب والمفكر، عن صانع المحتوي شريف جابر، بعد منعه من السفر وملاحقته وتهديد حياته بسبب المحتوي الذي يقوم بنشره عبر قناته علي يوتيوب.
وقال "منتصر" عبر حسابه علي فيس بوك: "شريف جابر، هذا الشاب الذكي كل جريمته انه مختلف في فكره الديني.. واحد عكس التيار أمام جحافل.. فيديو غلبان أمام خمسميت قناة وألف برنامج ديني ".
وتابع: "اختلف معاه زي ما انت عايز يعمل فيديو اعمل ألف فيديو رداً عليه.. ليه الخوف منه والرعب والتربص بيه وتعقبه.. ليه هو محاصر ومطارد ومهدد وكمان مش عارف يسافر!! كل ده ليه ؟
وأضاف خالد منتصر : "هربان جوه مصر وبيستغيث انه يسافر بره حفاظاً على حياته ولا حياة لمن تنادي".
وتسأل: هل منتظرين حتى تسمعوا خبر انتحاره ، ويتكتب مانشيتات عن انتحار أو مقتل شاب مصري لا ديني.. هو لا شال سلاح ولا عمل تنظيم ولا قتل ولا قام بتفجيرات؟".
وأوضح: كل اللي بيعمله بيعمل فيديوهات من أوضة متر في متر ، بيصور ويمنتج بنفسه وده دليل تاني على انه شاب عبقري ..انه بيعمل الفيديوهات اللي بتهز التيار السلفي وبالجوده والمهاره دي وهو في الظروف الخانقه دي".
وأشار أن الشاب ده كان من الأوائل علي الثانوية العامة ، وكان نفسه يتخصص في الفلسفة ولكن أستاذه لما شريف جادله في المدرج وأفحمه، بلغ عنه ادارة الجامعة واتهمه بالالحاد وفصلوه وما كملش مش مطلوب الا انه يسافر بره هو مش محتاج لا تطلعوه في تليفزيون ولا على شاشة ولا تشغلوه ولا أي حاجة سيبوه يخرج وبس كل انسان وله طاقة واللي بيحصل في الشاب ده كتير ومالوش أي لزمه ولا معنى ".
وأكد أن اللي بيخاف من فيديوهاته يبقى مرعوب من هشاشة فكرته لو واثق من قوة فكرتك مش حتخاف تسمع شريف ولا حتخاف تشوفه ولا حتخاف انه يسافر .مش لازم كل الناس تبقى اسطمبه وكتالوج واحد زي حبات اللوبيا ولون الغربان وعيون الصينيين الطيف مش لون واحد مش عيب برضه ان شريف اللي عمره ما اتسبب في فتنة طائفية ولا فتاوي قتل أو تكفير يبقى مش عارف يسافر والداعيه بتاع السبايا والاحتياجات وتكفير المسيحيين قاعد في بلاد العم سام ينزل فيديوهات تحريض ويرجع ويستقبل استقبال الابطال .
