كتب - محرر الاقباط متحدون
علق الخبير الاقتصادي محمد رمضان على قرار الحكومة رفع سعر رغيف الخبز المدعم إلى 20 قرشا من أول يونيو المقبل، وهو القرار الذي اثار غضب عدد كبير من المصريين، حيث رغيف الخبز كان الملاذ الاخير للمواطن بعد الارتفاع الجنوني في اسعار اللحوم والدواجن والاسماك والعديد من السلع الغذائية .
وكتب رمضان عبر حسابه على فيسبوك :" الواحد مش قادر يفهم قرار رفع أسعار الخبز 300 ٪، لأنه الحقيقة بأي منطق مفيش منطق في القرار ده، لا القرار حيوفر فلوس كثيرة يعني ولا حاجة، كل التوفير أعتقد في حدود 12 مليار جنيه في السنة وده رقم تافه بالمقارنة بموازنة فيها إجمالي الاستخدمات فيها حوالي 5.5 تريلون جنيه.
ع الناحية الثانية العيش ده ومنظومة التموين بشكل عام هي أفضل وأكفأ شيء وصلنا له في مصر في دعم الفقراء، وبمقاييس مختلفة لتقييم الأثر علي الاستهلاك وقياس الجوع وكل شيء هي أفضل من الدعم النقدي بمراحل وأنسب إجتماعيا لمصر ميت مرة من الدعم النقدي.
بحسب أرقام الفاو فإن المصريين يحصلون علي ثلث سعراتهم الحرارية اليومية من القمح ( العيش بشكل أساسي) و45٪ من البروتين اليومي يأتي من القمح ومنتجاته في مصر.
يعني حرفيا ثلث سعرات هذا الشعب، ونص بروتينه الضروري للأطفال بالتحديد، تكلفته 130 مليار جنيه اللي هو رقم دعم التموين الكلي ، دي مستويات كفاءة في إستغلال الموارد الشحيحة تقارب فكرة " الحصص الغذائية " وقت الحروب والله.
بمعني ما تكلفه غذاء الفقراء في مصر رخيصة جدا جدا جدا ، وده بيحافظ علي شيء مهم جدا وهو أنه ميبقاش في جوع منتشر مع نسبة الفقر المرتفعة.
مصر فيها فقراء كثير في مصر (30 ٪ بحسب أرقام الحكومة) ونسبة أكبر بكثير لو خدنا متوسطات خط الفقرالعالمي ( 60 ٪ تقريبا ). لكن العيش ومنظومة دعم التموين دول بيحافظوا علي أنه ميبقاش في جوع واضح وكبير مع نسب الفقر المرتفعة دي.
عشان كده البنك الدولي نفسه كان بيقول أنه منظومة الخبز دي وعلي الرغم من كل مشاكلها في 2010 حافظت علي عدم هبوط 9٪ من سكان مصر وقتها تحت خط الفقر بعد أزمة الغذاء في 2008.
الاعتماد المكثف ع الخبز ده له مشاكله الصحية الكبيرة لكنه هو أرخص شيء ، عشان كده الحكومة بتدعمه بالمناسبة، سله دعم الغذاء بتاعه الحكومة دي هي أكثر سلة رخصا ممكن تدعمها وأكثر سلة صحيا سيئة، وإستمرت في دعمها من هذا المنطق بالمناسبة رغم أنه كان في حلول كثيرة ممكن تتعمل لإصلاح سلة الدعم دي.
واختتم :" حرفيا إحنا كنا فقراء بس مش جعانين بمعني أنه بناخد عدد سعرات يومية كاف أنك متبقاش جعان، ومعظم السعرات دي من العيش والقمح.. دلوقتي الحكومة بتقولنا " لا حتبقوا فقراء وحتجوعوا كمان ".
