د. هاني ر. صموئيل
خُبز مدعّم قَالْ رَفعُوهْ
مِن خَمسهْ إِلى عِشرين قرشْ
والغَلبَانْ دَه أكيد نَقَطُوهْ
وعلى دماغُهْ بيعملوا مارشْ
دَعوة إِيهْ ومناقشة إِيهْ

وأي تصوّر هاتناقشُوهْ؟
دَه المسكين طلّعتوا عينيهْ
فيه إِيه تَاني رَاح تاخدوه؟
اِحتياجاتْ النَّاس للعيش
أمر ضروري ليه تمسوهْ؟
إلَّا الخبز بلاش تلطيش

النَّاس تعبت فوقوا يا هُوهْ
خُد مِن أَصحاب الملايين
وإدّي الفُقرا وخلِّي الدَّعم
خُبز العيش محتاج تَأمين!
مش هايكون العيش واللحم!
أيوه رغيف العيش دَه بَقالُهْ
تَلاتين سَنهْ من عَهد مباركْ

كنتوا سبوه كدهو على حَالُهْ
(أيقونهْ) وربنا هيباركْ
[سعرْ رَغيفْ الخُبزْ يَا بَاشَا]
المفروض تتأنَّى عليه
وإنْ كانْ يَعني لابد (نقاشا)
يبقى ملف الخِلفهْ يا بيهْ

أيوهْ يَا عَالم هَدّوا الخِلفَهْ
وإتعلّموا من دَرس الصين
هَدّوا اللعب، الأَحوال واقفهْ
سَاعدوا بلدكو يَا مَصريينْ
قبل ما ترفع دَعم نَصيحهْ
فَكّر ف الفقرا المساكين

ما اللي حياتهم يعني مُريحهْ
مش فارقهْ "خَمسه" و" عشرين"
قَطاعات أُخرى أكيد محتاجَهْ
زي الصِّحه والتّعليمْ
والكهربا عَشَان التّلاجَهْ
والتَّكيف ما الحَر غَشيمْ

كلمه في ودنَك يَا مَسؤولْ
مش هيلاقي قبول وبجد
لو حَبيت أختمها وأقول:
حيل النَّاس م الغلا متهَد
- د. هاني ر. صموئيل
#HanyRSamuel
#قصيدة_خُبز_مدعَّم
٣٠ مايو ٢٠٢٤

وعلى هامش القصيدة أضيف:
حل الأزمة الحالية في كلّمتين وباختصار ...
أولًا: انخفاض الزيادة السكانية... يعني ولد وبنت تعرف تربيهم وتعلّمهم أفضل من (زوربة) عيال جَهلة ومش لاقيين يأكلوا وتايهين في الشوارع.
ثانيًا: ضبط موضوع الزواج من أكثر من امرأة وهنا أتكلم من (منظور اجتماعي اقتصادي) في الأقل في الأزمة الحالية. لأن هذا يضاعف في الزيادة السكانية بما لا يتناسب مع دخل الفرد ولا مع ميزانية الدول. وللحديث بقية...