كتب - محرر الاقباط متحدون 
علق الكاتب محمد محمود على واقعة ضرب وسحل عروسة على يد عريسها داخل قاعة زفاف بالشرقية .
 
وكتب محمود عبر حسابه على فيسبوك :" عروسة بترقص ليلة فرحها زيها زى آلاف البنات فى مصر ، فرحانة وسعيدة إن النهاردة ليلة زفتها على سبع السبوعة وبغل البغولة وجحش الجحوشة، سبع العشة اتنفض واتعصب والدم غلى فى عروقه وزعق فى المسكينة ، قامت البنت من كسفتها وقعت وهى بترقص ، قام المعلم ساحبها وهى واقعة على الأرض وجاررها كما ولامؤاخذة البهيمة ناحية الكوشة.
 
 
وتابع :" يتجمع أهل العروسة ويتحمق شاب منهم وينزل فى العريس البطل ضرب وقسمة وحساب مثلثات ، تهيص الدنيا وتظيط ويختلط الحابل بالنابل ، اى والله الحابل بالنابل ، والستات تصوت والرجالة تقول حى على الجهاد وتقوم عركة وخناقة ولا خناقات حميدو فتوة اسكندرية فى زمانه .
 
واضاف :" المهم يتدخل ولاد الحلال ويلموا الموضوع وايه بقاااااا ؟ طلع الغضنفر الهزبر يعتذر ويقول معلش يا إخوانا انا انفعلت وعملت اللى عملته وانا مش فى وعيي !!!!! 
ليه يا ضنايا كفانا الشر ؟ 
خير يا كوتوموتو ايه اللى جرى لك ؟ 
قال ايه يا ولاد ، قال ايه يا كماحة ؟ 
قال الجدع معمول له سحر اسود 
اى والله سحر اسود ، لا هو بنى ولا فوشيا ولا حتى كاكى ، لأ سحر اسوووود بس فاتح شوية، عادى ، اعمل اى مصيبة وقول اصل كان معمول لى عمل ومعمول لى سحر اسود ، كان راكبنى جنى كافر ، كان قرينى مقريف حبتين وطلع زرابينه عليا ، مفيش مشكلة يا ابن والدى ، لا تتعجب ، انت فى مصر.