اكتب مقالى اليوم بمناسبه عيد الاب
د. أمير فهمى زخارى المنيا
عارف إيه إللي بيخلي أبوك يدور يطفي أنوار الشقة؟
ويزعق للي بيرزع الباب جامد؟
عارف إيه إللي بيخليه ينصحك بكلام مكرر وهو متأكد إنك مش هتنفذه ؟!

عارف ليه بيبقى متضايق يمكن أكتر منك كمان لما تجيب درجة وحشة؟
عارف إيه إللي بيخليه فرحان جداً ومرتاح نفسياً وانت بتصرف فلوسه ف حاجة هو بيراجع نفسه أكتر من مرة إنه يشتريها لنفسه؟
طب عارف إيه إللي جايبله الضغط والسكر من عصبيته على حاجات تافهة من وجهة نظرك؟

أنا كنت زيك كده مش عارف إيه السر ف كده ..
بس لما كبرت وبقيت أب ولقيتني تلقائي بأعمل كده فهمت السر ..

المسؤولية..

المسؤولية إللي بتخليك تفرح وتستمتع بإبنك وهو بياكل ويشرب ويلبس ويصرف .. أكتر من فرحتك ومتعتك لما إنت شخصياً تعمل كده ..
المسؤولية إللي بتخليك حامل هم مستقبل إبنك في الوقت إللي هو نفسه مش مهتم بحاضره ..

عارف لما تبقى راكب جنب السواق .. إنت بتنام وتصحى وتبص من الشباك وتقلب في المحطات وتلعب بالموبايل .. وهو ماسك الدركسيون وعينه على البنزين والزيت والحرارة وعداد السرعة والطريق ..

لما تكبر هتحس بده كله ..
لأنك باختصار ..
هتبقى السواق...

انا كتبت المقال ده النهارده علشان مناسبه الأحتفال بيوم الأب ( في مصر الاحتفال بيه يوم 20 يونيو) ... ياريت كل واحد يروح لأبوه ويقوله كل سنه وانت طيب ولو هو مش موجود ادعو له واطلب له الرحمه ... تحياتى  
د. أمير فهمى زخارى المنيا